Husband & wife: रात्रीच्या वेळी सुनसान रस्त्यावर पती पत्नीला विसरला, कार घेऊन १६० किमी पुढे गेला, त्यानंतर...

Husband & wife: कारने सोबत जात असताना एक पती सुनसान रस्त्यावर पत्नीला विसरून तब्बल १६० किमी पुढे गेल्याचा धक्कादायक प्रकार समोर आला आहे.

बाजारात फिरताना, प्रवासाला जाताना पती-पत्नींपैकी कुणीतरी एकमेकांना विसरून पुढे गेल्याचा प्रकार तुमच्यासोबतही घडला असेल. मात्र कारने सोबत जात असताना एक पती सुनसान रस्त्यावर पत्नीला विसरून तब्बल १६० किमी पुढे गेल्याचा धक्कादायक प्रकार समोर आला आहे. पती विसरून पुढे गेल्याने पत्नीला सुमारे २० किमी चालत पुढे यावे लागले. अखेरीस पतीला एक फोन आला, त्यानंतर पत्नी कारमध्ये नसल्याचे पतीला समजले.

हा धक्कादायक प्रकार थायलंडमधील महासराखम प्रांतात घडला आहे. ५५ वर्षीय बुंटोम चाईमून त्यांची ४९ वर्षांची पत्नी एमुनाए चाईमून यांना घेऊन २५ सप्टेंबर रोजी रोड ट्रिपवर गेले होते. यादरम्यान, पती बुंटोम हे वाटेत वॉशरूममध्ये गेले. ते परत आले तेव्हा त्यांनी पत्नी कारमध्ये मागच्या सीटवर झोपली आहे, असं समजून त्यांनी कार सुरू केली आणि पुढे निघून गेले. मात्र ते बाहेर गेले असताना त्यांच्या पत्नीही नैसर्गिक विधीसाठी बाहेर गेल्या होत्या. मात्र त्यांनी पतीला कल्पना दिली नव्हती.

पत्नी जेव्हा परत आली तेव्हा त्यांनी पाहिले की त्यांचे पती कारसह तिथून निघून गेले आहेत. अंधार आणि सुमसान रस्ता पाहून त्या घाबरल्या. त्यानंतर रात्री अंधारात सुमारे २० किमी चालत राहिल्या. पहाटे ५ वाजता त्या स्थानिक पोलीस ठाण्यात पोहोचल्या. तसेच घडलेल्या प्रकाराची माहिती दिली. त्यांना त्यांच्या पतीचा मोबाईल नंबर आठवत नव्हता. त्यानंतर त्यांनी पोलिसांकरवी आपल्या मोबाईलवर फोन करून पाहिला. मात्र पतीने फोनच उचलला नाही.

त्यानंतर पोलिसांनी सदर महिलेच्या नातेवाईकांनाही फोन करण्याचा प्रयत्न केला. या सर्वामध्ये सकाळचे आठ वाजले. अखेर पोलिसांना या महिलेच्या पतीशी संपर्क झाला. तोपर्यंत ते १६० किमी लांब गेले होते. 

दरम्यान, आपण पत्नीला सोडून खूप लांब आलो असल्याची जाणीव पतीला झाली. त्यानंतर त्यांनी कार यूटर्न केली आणि पत्नीला परत आणण्यासाठी परतले. पत्नीने सांगितले की, आमच्या विवाहाला २७ वर्षे झाली आहेत. आम्हाला एक मुलगा आहे.  परत आलेल्या पतीला पोलिसांनी एवढा वेळ तुम्ही पत्नीला पाहिले नाही का अशी विचारणा केली. पोलिसांचा प्रश्न ऐकून पती खजील झाला. ते म्हणाले की, मला वाटले पत्नी मागच्या सिटवर आहे आणि ती झोपली असावी. दरम्यान, पत्नीजवळ आल्यावर पतीने तिची माफी मागितली.