रात्रीच्या वेळी अवकाशातून अशी दिसते भारत - पाक सीमा

मुंबई, दि. ६ - भारत आणि पाकिस्तान या दोन देशातून विस्तव जात नाही, परंतु त्यांच्यामधली सीमारेषा मात्र रात्रीच्या वेळी अत्यंत झगमगीत दिसते. हे दृष्य उपलब्ध झालंय नासामुळे. नासाने भारत व पाकिस्तान अवकाशातून कसे दिसतात याचा काढलेला फोटो आपल्या फेसबुक पेजवर टाकलाय. विशेष म्हणजे इंटरनॅशनल स्पेस स्टेशनवर असलेल्या एका अंतराळवीराने सप्टेंबर २३ रोजी निकॉन D4 या डिजिटल कॅमे-याने २८ mm ची लेन्स वापरून हा फोटो काढलाय. आंतरराष्ट्रीय सीमारेषा या मोजक्याच देशांच्या बाबतीत रात्रीच्या वेळी इतक्या स्पष्ट दिसतात, त्यातील भारत पाक सीमारेषा आहे. भारत व पाक यांच्यातील सीमारेषा सुरक्षा दलांच्या विशिष्ट अशा ऑरेंज रंगाच्या दिव्यांच्या झगमगाटामुळे उठून दिसते.