काश्मीरला स्वतंत्र करण्यासाठी अफगाणहून येणार जिहादी

नवी दिल्ली, दि. १५- काश्मीरला स्वतंत्र करण्यासाठी अफगाणिस्तानहून जिहादींचे एक पथक भारतात येणार आहे असा चिथावणीखोर इशारा अलकायदाने दिला आहे. भारतातील मुसलमानांनी सिरीया आणि इराकमधील मुसलमानांप्रमाणेच भारताविरुद्ध जिहाद पुकारावे असे आवाहनही अल कायदाने केले आहे.

अलकायदाच्या पाकिस्तान सेलचा वरिष्ठ नेता मौलाना आसीम उमर याने एक व्हिडीओ जाहीर केला असून 'द वॉर कंटीन्यू: अ स्टेटमेंट ऑन काश्मीर्स मुस्लीम' असे या व्हिडीओचे नाव आहे. यात उमरने भारताविरुद्ध चिथावणीखोर वक्तव्य केले आहे. उमर म्हणतो, काश्मीरला स्वतंत्र करण्यासाठी अफगाणहून जिहादी येणार आहेत. धक्कादायक बाब म्हणजे यात उमरने काश्मीरसह संपूर्ण भारत व पाकिस्तानमधील नागरिकांनी जिहाद पुकारावे असे आवाहनही केले आहे.

या चिथावणीखोर व्हिडीओत श्रीनगरमध्ये २०१० मध्ये भारतीय सुरक्षा दल आणि काश्मीरमधील सर्वसामान्य नागरिकांमध्ये झालेल्या बाचाबाचीचे दृष्यही दाखवण्यात आले आहे. 'आज संपूर्ण जगात मुसलमानांनी हत्यार हाती घेतले असून ते जिहादमध्ये सामील होत आहेत. जे मुस्लीम बांधव शांतीपूर्ण मार्गाने जिहादसाठी लढत होते तेदेखील आता निराश झाल्याने सशस्त्र लढ्यासाठी सज्ज झाले आहेत असे या व्हिडीओत म्हटले आहे. कट्टर इस्लामी देश म्हणून ओळखले जाणारे सिरीया, इराक, अल्झेरिया आणि अन्य देशांचे दाखले या व्हिडीओत देण्यात आले आहे. 

सिरीया बनतोय दहशतवाद्यांचे केंद्र

अफगाणिस्तानऐवजी सिरीया दहशतवाद्यांचे केंद्र बनल्याचे या व्हिडीओत म्हटले असून आता त्यांचे पुढील लक्ष्य काश्मीर असल्याचा दावाही करण्यात आला आहे. यापूर्वीही युरोप व रशिया या देशांनी यापूर्वीही सिरीयामधील विरोधी गटाला कट्टर इस्लामी धडे दिले जात असल्याचा इशारा दिला होता. सिरीयातील जबहत अल नसरा या संघटनेचे अल कायदाशी थेट संबंध असल्याचा गौप्यस्फोटही रशियाने केला होता. या व्हिडीओत अल कायदाने युरोपमध्येही हल्ल्याची धमकी दिली आहे.