Hijab Controvercy: 'धार्मिक पोशाखांच्या परवानगीबाबत कर्नाटकनं ठरवू नये'; हिजाब प्रकरणात आता अमेरिकेची उडी

शाळा आणि महाविद्यालयांमध्ये हिजाबवर बंदी घालणं हे धार्मिक स्वातंत्र्याचं उल्लंघन असल्याचं अमेरिकेनं म्हटलं आहे. 

नवी दिल्ली: कर्नाटकातून सुरु झालेल्या हिजाब वादावरुन राष्ट्रीय-आंतराष्ट्रीय पातळीवर पडसाद उमटू लागले आहेत. कर्नाटकातील शैक्षणिक संस्थांमध्ये हिजाबवरून निर्माण झालेल्या वादावर आता अमेरिकेने देखील आपली प्रतिक्रिया दिली आहे. शाळा आणि महाविद्यालयांमध्ये हिजाबवर बंदी घालणं हे धार्मिक स्वातंत्र्याचं उल्लंघन असल्याचं अमेरिकेनं म्हटलं आहे. 

यूएस सरकारमधील आंतरराष्ट्रीय धार्मिक स्वातंत्र्याचे राजदूत रशाद हुसैन म्हणाले की, धार्मिक स्वातंत्र्यामध्ये लोकांना त्यांचे धार्मिक कपडे निवडण्याचे पूर्ण स्वातंत्र्य आहे. भारतातील धार्मिक पोशाखांना परवानगी द्यायची की, नाही हे कर्नाटक राज्यानं ठरवू नये. शाळांमधील हिजाबवरील बंदी धार्मिक स्वातंत्र्याचे उल्लंघन करत असून महिला, मुलींकडं सरकार दुर्लक्ष करत आहे, असं रशाद हुसैन यांनी म्हटलं आहे.  

कर्नाटकात सुरु असलेल्या हिजाब प्रकरणाचे पडसाद देशभरात उमटत असतानाच आंतरराष्ट्रीय पातळीवर ही याचे पडसाद उमटू लागले आहेत. अनेक देशांकडून यासंदर्भात प्रतिक्रिया येत आहेत. याबाबात भारताने आपली भूमिका स्पष्ट केली आहे. कर्नाटकातील काही शैक्षणिक संस्थां मधील ड्रेसकोडवर काही देशांनी टीका-टिप्पणी सुरु केली आहे. यावर परराष्ट्र मंत्रालयाने खडे बोल सुनावले आहेत. कर्नाटक उच्च न्यायालयात या प्रकरणाची छाननी सुरु आहे. मात्र, अशावेळी देशाच्या अंतर्गत मुद्द्यांवर इतर कोणत्याही देशाची टीका खपवून घेतली जाणार नाही, असे परराष्ट्र मंत्रालयाने म्हटलं आहे.

भारतातील मुस्लिमांना भडकवण्याचा डाव-

११ फेब्रुवारीच्या आयबी अलर्टनुसार पन्नूने भारतीय मुस्लिमांना भडकवण्याचा प्रयत्न केला आहे. हिजाबवर लावलेली बंदी उद्या अजान आणि कुराणवर लावली जाईल. त्यासाठी विरोध करण्याची वेळ आता आली आहे. भारताला उर्दुस्तान बनवा. मुस्लिमांचा वेगळा देश बनवलेल्या पाकिस्तानकडून शिका असं त्याने म्हटलं आहे. 

हिजाब वादाला चालना देण्यासाठी मोठ्या प्रमाणात फंडिंग करण्यात येणार आहे. त्यामुळे स्थानिक पोलीस आणि सर्व एजन्सीला अलर्ट राहण्याच्या सूचना दिल्या आहेत. हिजाब रेफरेंडमसाठी एक वेबसाईट बनवण्यात आली आहे. त्यात लोकांना ऑनलाईन सपोर्ट करण्यासाठीही सांगितले जात आहे. या सर्व योजनेमागे पाकिस्तानी गुप्तचर यंत्रणा ISI चा हात असल्याचं भारतीय गुप्तचर यंत्रणेने दावा केला आहे.

काय आहे हिजाबचा वाद?

कर्नाटकातील अनेक शाळा आणि महाविद्यालयांमध्ये हिजाबवरुन गोंधळ सुरू आहे. कर्नाटकातील एका कॉलेजचा व्हिडिओ समोर आला होता. जिथे एक मुलगी हिजाब घालून कॉलेजमध्ये असताना विद्यार्थ्यांच्या जमावाने मुलीसमोर जय श्री रामच्या घोषणा दिल्या होत्या. त्यावर, मुलगीही अल्लाहू अकबरचा नारा देत उत्तर देते. हा व्हिडिओ सोशल मीडियावर प्रचंड व्हायरल झाला. 

हिजाब वादाचे पडसाद पाकिस्तानातही उमटले-

हिजाब वादाचे पडसाद पाकिस्तानातही उमटले आहेत. नोबेल शांतता पुरस्कार विजेती मलाला युसूफझाईनेही या घटनेवर प्रतिक्रिया दिली आहे. मुलींना अशा प्रकारे हिजाब घालून प्रवेश करण्यापासून रोखणे भयावह असल्याचे तिने म्हटले. मलालाने ट्विट करून लिहिले - हिजाब परिधान केलेल्या मुलींना शाळेत प्रवेश करण्यापासून रोखणे हे भयानक आहे. भारतीय नेत्यांनी मुस्लिम महिलांना दुर्लक्षित करणे थांबवावे.