130 बायका आणि 203 मुलं असलेल्या मौलवीचं निधन

अबूजा, दि. 31 - नायजेरियातील मौलवी मोहम्मद बेलो अबूबकर यांचं वयाच्या 93 व्या वर्षी निधन झालं. एका खास कारणासाठी त्यांचं नाव नेहमी चर्चेत होतं. त्यांनी एकूण 130 महिलांशी लग्न केलं  होतं.

 

'लग्न करणं हे पवित्र आहे आणि त्यासाठीच मला या जगात पाठवण्यात आलं आहे' असं त्यांचं म्हणणं होतं. आजारपणामुळे त्यांचं शनिवारी निधन झालं. मात्र, त्यांना कोणत्या आजाराने ग्रासलं होतं हे कळू शकलं नाही.   

 

डेली मेलने दिलेल्या वृत्तानुसार, गेल्या काही दिवसांपासून बेलो आजारी होते आणि शेवटचा श्वास त्यांनी आपल्या राहत्या घरीच घेतला. ''कोणताही पुरूष जेवढे हवे तेवढे लग्न करू शकतो असं कुराणामध्ये म्हटलं आहे'' असं ते मध्यंतरी म्हणाले होते. त्यामुळे चांगलाच वादही निर्माण झाला होता.   2008 साली त्यांच्यावर अनेक मौलवींनी टीका केली होती. मात्र,  लग्न करत राहणं हे माझं पवित्र ध्येय आहे असं ते म्हणायचे . त्यांनी एकूण 130 लग्न केली असून त्यांच्यापश्चात 203 मुलं आहेत.