अरे बापरे ! सौदी अरेबियात मिळतायत पत्नीला मारहाण करण्याचे धडे

पत्नीला मारहाण कशी करावी ? यासाठी चक्क रोगनिवारणतज्ञ सल्ला देत असल्याचा व्हिडिओ सध्या सोशल मिडियावर व्हायरल होत आहे

ऑनलाइन लोकमत - 

रियाध, दि. 16 - पत्नीला मारहाण कशी करावी ? यासाठी चक्क रोगनिवारणतज्ञ सल्ला देत असल्याचा व्हिडिओ सध्या सोशल मिडियावर व्हायरल होत आहे. धक्कादायक गोष्ट म्हणजे सौदी अरेबियामधील नॅशनल टेलिव्हिजनवर हा व्हिडिओ प्रदर्शित करण्यात आला होता अशी माहिती मिळत आहे. 

 

एव्हीडी न्यूज डॉट कॉमने दिलेल्या वृत्तानुसार हा व्हिडिओ फेब्रुवारी महिन्यात दाखवण्यात आला होता. एप्रिल 2016 मध्ये अमेरिकेत हा व्हिडिओ दाखवण्यात आल्यानंतर ही माहिती समोर आली. वेबसाईटने दिलेल्या माहितीनुसार सौदी सरकारने परवानगी दिल्यानंतरच नॅशनल टेलिव्हिजनवर हा व्हिडिओ दाखवण्यात आल्याचं सांगितलं आहे. 

 

रोगनिवारणतज्ञ खालेद-अल-साकबे यांनी या व्हिडिओतून बायकोला मारहाण कशी आणि का करावी ? याबद्दल माहिती दिली आहे. 'बायकोला मारहाण करणे हा महत्वाचा मुद्दा आहे. यामध्ये अनेक अडथळे येत आहेत. पण अल्लाची इच्छा आहे. आपण हे अंतर सुरक्षित पार करु', असं खालेद-अल-साकबे बोलले आहेत.

 

'शिस्त लागणे हा पत्नीला मारहाण करण्याचा हेतू असून आपला राग व्यक्त करण्यासाठी नाही', असा दावा खालेद-अल-साकबे यांनी केला आहे. तसंच मारहाण करताना टोकदार वस्तू किंवा रॉडचा वापर करु नये असाही सल्ला दिला आहे. 

 

'इतकंच नाही तर मारहाण करण्याआधी पत्नीला तिला तुमच्या हक्कांची आणि तिच्या कर्त्यव्यांची जाणीव करुन द्या', असंही खालेद-अल-साकबे यांनी सांगितलं आहे. पत्नीला मारहाण करण्याचं समर्थन करताना खालेद-अल-साकबे यांनी आपण ज्याप्रकारे आपल्या पतीला वागवत आहोत ते चुकीचे आहे याची जाणीव करुन देणे त्यामागचा हेतू असल्याचं म्हटलं आहे. 

 

'दुर्दैवाने काही पत्नींना आपल्या पतीप्रमाणे समान आयुष्य जगण्याची इच्छा होते, ही खुप मोठी समस्या आहे', असं खालेद-अल-साकबे बोलले आहेत. काही पत्नी आपल्या पतीला मारहाण करण्यासाठी डिवचत असल्याचाही दावा खालेद-अल-साकबे यांनी केला आहे.