पॅरिस हल्ल्याचा मास्टरमाइंड अब्देलहमिदने केली आत्महत्या?

संपूर्ण जगाला हादरवून टाकणा-या पॅरिस दहशतवादी हल्ल्याचा मास्टरमाइंट अब्देलहमीद अबौदने आत्महत्या केल्याची शक्यता वर्तवण्यात येत आहे.

ऑनलाइन लोकमत

पॅरिस, दि. १८ - संपूर्ण जगाला हादरवून टाकणा-या पॅरिस दहशतवादी हल्ल्याचा मास्टरमाइंट अब्देलहमीद अबौद व त्याच्या पत्नीने आत्महत्या केल्याची शक्यता फ्रान्सच्या भारतातील राजदूतांनी वर्तवली आहे. फ्रेंच पोलिसांनी बुधवारी उत्तर पॅरिसमध्ये सुरू केलेल्या शोधमोहिमेदरम्यान एका अपार्टमेंटमध्ये लपलेल्या अब्देलहमीदने आत्महत्या केल्याची तर त्याच्या पत्नीने स्वत:ला बॉम्बने उडवल्याचे वृत्त समोर येत आहे.

गेल्या आठवड्यात शुक्रवारी पॅरिसमध्ये इसिसच्या दहशतवाद्यांनी हल्ला केला होता. या हल्ल्यात १२९ जणांचा मृत्यू झाला होता. या हल्ल्यानंतर फ्रान्समध्ये पोलिसांनी छापेमारी सुरु केली असून उत्तर पॅरिसमधील सेंड डेनिस येथे पोलिसांची शोधमोहीम सुरु होती. यादरम्यान एका इमारतीमध्ये लपलेल्या संशयित दहशतवादी व पोलिसांमध्ये चकमक झाली. त्या इमारतीतच पॅरिस हल्ल्याचा मास्टरमाइंड अब्देलहमीद लपला होता व त्याने आत्महत्या केली, अशी माहिती समोर येत आहे. या चकमकीदरम्यान एका महिलेने स्फोट घडवत स्वतःला संपवले , ती महिला अब्देलहमीदची पत्नी असल्याची शक्यता वर्तवण्यात येत आहे. 

दरम्यान या कारवाईनंतर पोलिसांनी सात जणांना अटक केली असून दोन दहशतवाद्यांना कंठस्नान घातले आहे.