पेशावर दहशतवादी हल्ल्याचा सूत्रधार सैन्याच्या कारवाईत ठार
By admin | Published: December 26, 2014 05:36 PM2014-12-26T17:36:58+5:302014-12-26T17:36:58+5:30
पाकिस्तानमधील पेशावर येथील सैन्याच्या शाळेवर दहशतवादी हल्ला घडवणा-या तालिबानी कमांडरला पाकिस्तानी सैन्याने ठार मारले आहे.
Next
ऑनलाइन लोकमत
पेशावर, दि. २६ - पाकिस्तानमधील पेशावर येथील सैन्याच्या शाळेवर दहशतवादी हल्ला घडवणा-या तालिबानी कमांडरला पाकिस्तानी सैन्याने ठार मारले आहे. सद्दाम असे या तालिबानी कमांडरचे नाव असून तो 'तेहरिक ए तालिबान' या दहशतवादी संघटनेचा सदस्य होता.
काही दिवसांपासूर्वी पेशावरमधील लष्करी शाळेवर तालिबानी दहशतवाद्यांनी हल्ला केला होता. यामध्ये सुमारे १५० जणांचा मृत्यू झाला होता. मृतांमध्ये विद्यार्थ्यांचे प्रमाण सर्वाधिक असल्याने या हल्ल्याविरोधात पाकमध्ये संताप व्यक्त होता. पाक सरकारनेही तालिबानी दहशतवाद्यांविरोधात कठोर पावले उचलण्याची घोषणा केली असून पाक सैन्याने तालिबानी दहशतवाद्यांनी आश्रय घेतलेल्या भागांमध्ये कारवाईला सुरुवात केली आहे. गुरुवारी रात्री खैबरमधील जमरुदपूर भागात पाक सैन्य आणि तालिबानी दहशतवाद्यांमध्ये चकमक झाली. यामध्ये तालिबानी कमांडर सद्दामला कंठस्नान घालण्यात यश आल्याची माहिती स्थानिक अधिका-यांनी दिली. या चकमकीमध्ये काही दहशतवादी गंभीर जखमी झाले असून त्यांना सैन्याने ताब्यात घेतले आहे. पेशावरमधील शाळेवरील दहशतवादी हल्ला आणि पाकमधील सुरक्षा दलांवरील हल्ल्यामध्ये सद्यामचा सहभाग होता अशी माहिती पाकमधील सैन्याच्या अधिका-यांनी दिली.