प्रियांका चोप्राची Hollywood Entry, झळकणार बे वॉचमध्ये

बॉलीवूडमधली आघाडीची हिरॉइन प्रियांका चोप्रा हॉलीवूडमध्ये पदार्पण करत असून ड्वेन जॉन्सनबरोबर ती बे वॉचमध्ये झळकणार आहे. रॉक या नावाने ओळखल्या जाणा-या ड्वेनने टि्वटरच्या माध्यमातून ही बातमी कळवली आहे. प्रियांका बे वॉचच्या टीममध्ये जॉइन झाल्याचे त्यानं जाहीर केल्यावर सोशल मीडियावर चर्चेला उधाण आलं आहे. कुस्तीचा आखाडा गाजवलेल्या ड्वेननं हॉलीवूडमध्येही अॅक्शनपटांमध्ये छाप उमटवली असून त्याच्यासोबत प्रियांकाही आपली मोहर हॉलीवूडमध्ये उमटवेल अशी आशा आहे. विशेष म्हणजे प्रियांका बे वॉचमध्ये खलनायिकेच्या भूमिकेत दिसणार असून उत्कृष्ट नायिका असलेली प्रियांका खलनायिका म्हणूनही चांगलं काम करेल असं कौतुक ड्वेननं केलं आहे.

ड्वेनने प्रियांका ही जगातली सगळ्यात मोठ्या स्टार्सपैकी एक असल्याचं प्रशस्तीपत्रकही देऊन टाकलं असून त्यानं प्रियांकाबरोबरचे फोटो आणि व्हिडीयो क्लिपही शेअर केली आहे. 

बे वॉच या अत्यंत लोकप्रिय मालिकेवर आधारीत हा सिनेमा असून एबीसी चॅनेलवरच्या क्वान्टिको या मालिकेतल्या अलेक्स परीश या एफबीआयच्या एजंटच्या रोलमुळे प्रियांका आधीच जगभरच्या प्रेक्षकांच्या परीचयाची झालेली आहे. बे वॉचमुळे तिची हॉलीवूडशी नाळ जुळत असून तिकडेही ती चांगलीच लोकप्रिय होईल अशी अपेक्षा आहे. 

याआधी ऐश्वर्या रायने हॉलीवूडमध्ये आपला ठसा उमटवला होता, तर दिपिका पदुकोणही विन डिझेलबरोबर हॉलीवूडमधल्या एका चित्रपटात झळकत आहे. बॉलीवूडमधल्या नट्यांना हॉलीवूडमध्ये चांगले दिवस आलेले यावरून दिसत आहे.

She's one of the biggest stars in the world. Insanely talented, relentlessly smokin' and… https://t.co/qBnsNAFXOb

— Dwayne Johnson (@TheRock) February 16, 2016