श्रीलंकेत राष्ट्रपतींच्या बेडरुममध्ये आंदोलक घुसले अन् मखमली गादीवर खेळले WWE; Video व्हायरल

श्रीलंका आर्थिक दिवाळखोरीचा सामना करत असताना नागरिकांमध्ये प्रचंड रोष आहे. देशातील महागाईनं हाहाकार केला आहे.

कोलंबो-

श्रीलंका आर्थिक दिवाळखोरीचा सामना करत असताना नागरिकांमध्ये प्रचंड रोष आहे. देशातील महागाईनं हाहाकार केला आहे. श्रीलंका सरकार नागरिकांच्या रोषाला सामोरं जात असताना आंदोलकांनी आता श्रीलंकेच्या राष्ट्रपती भवनावरही ताबा मिळवला आहे. आंदोलक राष्ट्रपती भवनातील स्विमिंग पूल, किचन आणि लिविंग रुममध्ये धमाल करत असतानाचे व्हिडिओ काल सोशल मीडियातून समोर आले. आता राष्ट्रपतींच्या बेडरुममध्येही आंदोलक मखमली गादीवर उड्या मारतानाचा आणि WWE खेळतानाचा व्हिडिओ व्हायरल झाला आहे. 

सोशल मीडियात तुफान व्हायरल होत असलेल्या या व्हिडिओमध्ये आंदोलक नाचताना आणि धुमाकूळ घालताना दिसत आहेत. इतकंच नव्हे, तर राष्ट्रपतींच्या बेडवर मखमली गादीवर चक्क WWE खेळताना दिसत आहेत. WWE मधील समालोचनाचा ऑडिओ जोडून एक व्हिडिओ सध्या ट्विटरवर व्हायरल झाला आहे. यात काही तरुण राष्टपतींच्या बेडरुममधील बेडवर दंगा करताना पाहायला मिळत आहेत. 

आंदोलकांनी राष्ट्रपती भवनातील स्विमिंग पूलचाही आनंद घेतला. स्विमिंग पूलमध्ये आंदोलक मजा करतानाचे व्हिडिओ काल सोशल मीडियात व्हायरल झाले होते. अनेक जण राष्ट्रपती भवनात घुसून बेडवर लोळून सेल्फी टिपताना दिसत आहेत. तसंच राष्ट्रपती भवनातून जे जे काही आपल्याला पळवून नेता येईल ते सर्व काही आंदोलन घेऊन जातानाही दिसत आहे. 

This is hilarious...WWE on srilankan prime minister bed..🤣 pic.twitter.com/JT7t287K76

— भाई साहब (@Bhai_saheb) July 10, 2022

पोलिसांनी आंदोलकांना राष्ट्रपती भवनात प्रवेश करण्यापासून रोखण्यासाठी अश्रूधुराच्या नळकांड्या आणि पाण्याच्या फवाऱ्याचा वापर केला. पण आंदोलक मोठ्या प्रमाणात असल्यानं गर्दीला रोखण्यात पोलिसांनी यश आलं नाही. श्रीलंकेतील परिस्थिती आता हाताबाहेर गेली आहे.  

Protesters inside President's house pic.twitter.com/lN7x58XL6Q

— NewsWire 🇱🇰 (@NewsWireLK) July 9, 2022