दुबईच्या राजकुमारीची बिझनेस 'आयडिया'! पतीला दिला तलाक अन् लॉन्च केला Divorce परफ्यूम
By ऑनलाइन लोकमत | Published: September 10, 2024 03:27 PM2024-09-10T15:27:13+5:302024-09-10T15:31:03+5:30
Dubai princess perfume Divorce : इन्स्टाग्रावर पोस्ट लिहून पतीला तलाक देणाऱ्या दुबईच्या राजकुमारीने नवीन परफ्यूम लॉन्च केला. या परफ्यूमचे नाव राजकुमारी शेखा महरा यांनी 'डिव्होर्स' असे ठेवले आहे.
दुबईच्या राजकुमारीची बिझनेस 'आयडिया'! पतीला दिला तलाक अन् लॉन्च केला Divorce परफ्यूम
Sheikha Mahra Divorce perfume : चित्रपटात किंवा तुमच्या आजूबाजूला ब्रेकअप आणि घटस्फोट झाल्यानंतर लोक काय काय करतात, हे तुम्ही कधीतरी अनुभवले असेल. प्रेमात धोका दिलेल्या व्यक्तीला उत्तर देण्यासाठी किंवा बदला घेण्यासाठी बरेच पराक्रम करतात. पण, दुबईचे राजे मोहम्मद बिन राशिद अल मकतूम यांच्या मुलीने म्हणजे राजकुमारी शेखा महराने एक भन्नाट गोष्ट केली. ती आहे परफ्यूमबद्दल!
दुबईची राजकुमारी शेखा महरा पुन्हा एकदा चर्चेचा विषय ठरली आहे. दुबईच्या राजकुमारीने सोशल मिडिया प्लॅटफॉर्म असलेल्या इन्स्टाग्रामवर एक पोस्ट लिहून पतीला तलाक दिला होता. त्यानंतर शेखा महराने नवी पोस्ट केली आहे. ही पोस्ट नवीन परफ्यूमबद्दल आहे. या परफ्यूमच्या नावानेच सगळ्यांचे लक्ष वेधून घेतले आहे.
दुबईच्या राजकुमारीचा 'डिव्होर्स परफ्यूम'
राजकुमारी शेखा महराने इन्स्टाग्रामवर एक पोस्ट केली आहे. राजकुमारीने एक फोटो शेअर केला आहे. परफ्यूमचा फोटो असून, 'डिव्होर्स बाय महरा एम १' असे पोस्टमध्ये म्हटले आहे. गडद काळ्या रंगाची डिव्होर्स परफ्यूम बॉटल असून, हे नाव वाचून अनेक मजेशीर प्रतिक्रिया लोक पोस्ट करत आहेत.
एक यूजरने म्हटले आहे की, या परफ्यूममध्ये स्वातंत्र्याचा सुगंध असेल, असे विश्वासाने सांगू शकतो. तर दुसऱ्या यूजरने म्हटले आहे, काय क्रिएटिव्हीटी आहे. ही पोस्ट बघून तुमच्या घटस्फोटित पतीचा तिळपापड झाला असेल. अशा आशयाच्या कमेंट या पोस्ट लोक करत आहेत.
दुबईच्या राजकुमारीचा वर्षभरातच घटस्फोट
शेखा महरा यांनी सोशल मीडियावरून तलाक दिल्याच्या घटनेने सगळ्यांना आश्चर्याचा धक्का दिला होता. लोकांना तलाक देण्याच्या पद्धतीचे अनेकांनी समर्थन केले होते. शेखा महरा यांनी तलाक देतानाच पतीला अनफॉलो केले. इतकेच नाही, तर पतीसोबतच्या सगळ्या पोस्ट डिलीट केल्या होत्या. एका वर्षातच दोघांचा घटस्फोट झाला. दोघांना एक मुलगी आहे.