"लाल सागरात पुन्हा हल्ला केलात तर..."; अमेरिकेसह १३ देशांचा हुथी बंडखोरांना सज्जड दम

यूएस आणि त्यांच्या १२ मित्रराष्ट्रांनी बुधवारी येमेनच्या हुथी बंडखोरांना स्पष्ट इशारा दिला आहे

US Warns Houthi Rebels: यूएस आणि त्यांच्या १२ मित्रराष्ट्रांनी बुधवारी येमेनच्या हुथी बंडखोरांना स्पष्ट इशारा दिला आहे. लाल समुद्रात जहाजांवर हल्ला करणे थांबवा अन्यथा संभाव्य लष्करी कारवाईला सामोरे जाण्यास तयार राहा असा इशारा 'ऑपरेशन प्रोस्पेरिटी गार्डियन' ( Operation Prosperity Guardian ) ने दिला आहे. येमेनी दहशतवाद्यांनी १९ डिसेंबरपासून गाझामध्ये इस्रायल-हमास युद्धाला प्रतिसाद म्हणून किमान २३ हल्ले केले आहेत. राष्ट्राध्यक्ष जो बायडेन यांच्या प्रशासनातील एका वरिष्ठ अमेरिकन अधिकाऱ्याने हल्ले सुरूच राहिल्यास संभाव्य कारवाईंच्या अटींबद्दल स्पष्टीकरण देण्यास नकार दिला, परंतु इराणला समर्थन करणाऱ्या हुथी दहशतवादींना अमेरिका आणि त्यांच्या सहयोगी देशांकडून एक चेतावणी मिळावी यावर जोर दिला आहे.

बुधवारी मित्र राष्ट्रांनी हुथींकडून केल्या जाणाऱ्या हल्ल्यांचा निषेध करत संयुक्त निवेदन जारी केल्यानंतर लगेचच व्हाईट हाऊसच्या एका अधिकाऱ्याने नाव न सांगण्याच्या अटीवर ही माहिती दिली. निवेदनावर अमेरिका, ऑस्ट्रेलिया, बहारीन, बेल्जियम, कॅनडा, डेन्मार्क, जर्मनी, इटली, जपान, नेदरलँड, न्यूझीलंड, सिंगापूर आणि यूके यांनी स्वाक्षरी केली आहे. अमेरिकेने यूएन सुरक्षा परिषदेला हुथींविरूद्ध कारवाई करण्याचे आवाहन केले आणि हुथींना आर्थिक मदत  इराणला इशारा दिला की बंडखोरांना पाठिंबा देणे सुरू ठेवायचे की नाही याचा पर्याय आहे.

हुथींनी इस्रायललाही दिली धमकी

'ऑपरेशन प्रोस्पेरिटी गार्डियन' या संघटनेचे म्हणणे आहे की, आमचा स्पष्ट संदेश स्पष्ट आहे. आम्ही हे हल्ले तात्काळ थांबवण्याची आणि बेकायदेशीरपणे ताब्यात घेतलेली जहाजे आणि चालक दलाच्या सुटकेची मागणी करतो. जर हुथींनी जीवन, जागतिक अर्थव्यवस्था आणि या प्रदेशातील महत्त्वाच्या जलमार्गांमधील वाणिज्य मुक्त प्रवाह धोक्यात आणला तर त्याचे परिणाम त्यांना भोगावे लागतील. अलिकडच्या आठवड्यात हुथींनी लाल समुद्रातील जहाजांवर हल्ले केल्याचा दावा केला आहे.