१६० बसेस ‘कोरोना फ्री’; प्रवासी मात्र बेफिकीर..!

जालना : जिल्ह्यातील कोरोनाचा संसर्ग रोखण्यासाठी विविध उपाययोजना केल्या जात आहेत. याचाच एक भाग म्हणून राज्य परिवहन महामंडळाच्या जालना आगाराने जिल्ह्यातील तब्बल १६० बसेसना ॲन्टिमायक्रोबियल कोटिंग केले आहे. त्यामुळे या बसेस कोरोना फ्री झाल्या आहेत. मात्र, असे असले तरी बसमधून प्रवास करणारे अनेक प्रवासी प्रशासकीय सूचनांचे उल्लंघन करत बेफिकीरपणे प्रवास करत आहेत.

कोरोनाच्या पहिल्या लाटेचा प्रादुर्भाव झाला आणि शहरी, ग्रामीण भागातील प्रवाशांसाठी महत्त्वाची असलेली बससेवा बंद करण्यात आली. कोरोनाची दुसरी लाट आता ओसरली असली, तरी अनेक मार्गांवरील बसेस अद्यापही बंद आहेत. काही बसेस सुरू झाल्या आहेत, या बसमधून प्रवास करणाऱ्या प्रवाशांना कोरोनाची बाधा होऊ नये, यासाठी राज्य परिवहन महामंडळाने बसेसना ॲन्टिमायक्रोबियल कोटिंग करण्याचा निर्णय घेतला आहे. त्यानुसार विविध मार्गांवर असलेल्या जिल्ह्यातील १६० बसेसचे कोटिंग पूर्ण झाले आहे.

एका एस. टी.ला वर्षातून चारवेळा होणार कोटिंग

कोरोनाचा संसर्ग होऊ नये, यासाठी जालना जिल्ह्यातील बसेसना ॲन्टिमायक्रोबियल कोटिंग करण्याची प्रक्रिया सुरू आहे. किमान तीन महिन्यांनी हे कोटिंग होणे गरजेचे आहे. त्यानुसार जालना विभागीय महामंडळाकडून कोटिंगचे नियोजन केले जात आहेत.

एका बसचे ॲन्टिमायक्रोबियल कोटिंग करण्यासाठी जवळपास सात हजार रूपयांचा खर्च आला आहे. सद्यस्थितीत वर्षातून दोनवेळा बसेसना ॲन्टिमायक्रोबियल कोटिंग करण्याचे नियोजन करण्यात आले आहे. वरिष्ठ पातळीवरील अधिकाऱ्यांकडून येणाऱ्या सूचनेनुसार, पुढील कोटिंगबाबत निर्णय घेतला जाणार आहे. राज्य परिवहन महामंडळाच्या या निर्णयामुळे मात्र प्रवाशांना कोरोनापासून दूर ठेवण्यास मदत होणार आहे.

बाधित व्यक्ती उठून गेल्यानंतर धोका नाही, पण बाजूलाच बसला असल्यास

एखाद्या बाधित व्यक्तीने बसप्रवास केला तरी इतर प्रवाशांना कोरोनाची लागण होण्याचे प्रमाण ॲन्टिमायक्रोबियल कोटिंगमुळे कमी होते.

बसेसना ॲन्टिमायक्रोबियल कोटिंग केले असले, तरी बसद्वारे प्रवास करणाऱ्या प्रवाशांनी मास्क वापरासह इतर प्रशासकीय सूचनांचे तंतोतंत पालन करणे गरजेचे आहे.

प्रवासी म्हणतात

आम्ही बसद्वारे नियमित प्रवास करतो. परंतु, कोरोनामुळे बस बंद झाल्या होत्या. त्यावेळी अनेक अडचणी आल्या. आता बसेस पूर्ववत होत आहेत. त्यात बसेसना ॲन्टिमायक्रोबियल कोटिंग केले जात असल्याने प्रवास सुरक्षित होणार आहे.

- रामेश्वर शिंदे

कोरोनाचा संसर्ग वाढल्याने अनेकजण बसने प्रवास करण्यास नकार देत होते. परंतु, आता महामंडळाने बसेसना ॲन्टिमायक्रोबियल कोटिंग केले आहे. त्यामुळे प्रवाशांचा प्रवास सुरक्षित झाला आहे.

- सुनील म्हस्के

आगार व्यवस्थापक म्हणतात...

कोरोनाचा संसर्ग रोखणे आणि प्रवाशांचा प्रवास सुरक्षित करण्यासाठी बसेसना ॲन्टिमायक्रोबियल कोटिंग करण्यात आले आहे. असे असले तरी प्रवाशांनी बसने प्रवास करताना शासकीय सूचनांचे पालन करावे.

- प्रमोद नेहुल, विभाग नियंत्रक