कृषी पंढरी कडवंचीतील द्राक्ष उत्पादकांना ५० कोटींचा फटका

३० वर्षांपूर्वी कृषिभूषण विजयअण्णा बोराडे यांच्या मार्गदर्शनाखाली येथील ग्रामस्थांनी एकत्रित येत कृषी विज्ञान केंद्र आणि जर्मन पाणलोट क्षेत्र विकास संस्थेच्या माध्यमातून येथे जलसंधारणाची कामे झाली. माती नालाबांध, बांधबंदिस्ती नदीवर लहान - लहान बंधारे बांधून जमितील पाणीपातळी वाढविली. त्याचा परिणाम म्हणून येथे द्राक्ष बागांची लागवड करून येथील शेतकऱ्यांनी स्वत:च्या परिश्रमातून कृषी क्रांती केली. आज जवळपास दीड हजार लोकवस्तीचे गाव असलेल्या कडवंचीत जवळपास दोन हजार हेक्टरवर बागा फुलल्या आहेत.

गेल्या दहा ते पंधरा वर्षात येथील शेतकऱ्यांनी शेती हेच आपले घर मानून अनेकजण हे गावात राहण्याऐवजी शेतात राहणेच पसंत करतात. आज या द्राक्ष उत्पादनात सोनाका, माणिक चमन या जातींची द्राक्षे घेतली जातात. आत उन्हाळा सुरू झाला असून, यामुळे द्राक्ष बागांचा हंगाम तेजीत आहे. यंदा जबलपूर, चिखली तसेच अन्य गावांमधून बागा खरेदी करणाऱ्या बागायतदारांनी द्राक्ष बागांची खरेदी सुरू केली आहे. हे खरे असले तरी, गेल्या वेळच्या तुलनेत यंदा द्राक्ष बागांचे मोठे नुकसान झाले आहे.

चौकट

गेल्यावर्षी ७२ कोटींची उलाढाल

गेल्यावर्षी चांगले वातावरण राहिल्याने द्राक्ष उत्पादकांना त्यांच्या श्रमाचे फळ मिळाले होते. गेल्या हंगामात जवळपास ७३ कोटी रुपयांची उलाढाल झाली होती. ती यंदा केवळ दहा ते १२ कोटींवर येऊन ठेपली आहे. यामुळे यंदा शेतीत केलेला खर्च निघणेही अवघड झाले आहे.

मदतीची अपेक्षा

अतिवृष्टी तसेच परतीचा पाऊस यामुळे झालेल्या नुकसानीपोटी शासनाकडून मदत मिळाली. परंतु ही मिळालेली मदत द्राक्ष उत्पादकांसाठी अत्यंत कमी आहे. ही मदत आणखी वाढवून मिळावी, अशी या भागातील शेतकऱ्यांची मागणी आहे. एवढे होऊनही शेतकरी आपली हिंमत हरला नसून, एप्रिलमध्ये द्राक्ष बागांची दुसरी छाटणी असते, त्यावेळी तरी चांगले उत्पादन येईल, अशी आशा येथील द्राक्ष उत्पादक शेतकरी चंद्रकांत पाटील यांनी व्यक्त केली.