अ‌वैधरीत्या वाळूची वाहतूक करणारा अटकेत

संजयनगर येथे घरफोडी

जालना : घराच्या मागच्या बाजूच्या खिडकीचे गज वाकवून आत प्रवेश करून २५ हजार रुपयांचा मुद्देमाल लंपास केल्याची घटना जालना शहरातील संजयनगर येथे बुधवारी मध्यरात्री घडली. या प्रकरणी रवींद्र रामसिंग गोफणे यांच्या फिर्यादीवरून कदीम जालना पोलीस ठाण्यात गुन्हा दाखल करण्यात आला आहे. पुढील तपास पोलीस नाईक राठोड करीत आहेत.

मिरचीच्या आठ गोण्या चोरी

जालना : शेतातील झोपडीत ठेवलेल्या सात हजार २०० रुपयांच्या मिरचीच्या गोण्या चोरट्यांनी चोरून नेल्याची घटना बुधवारी मध्यरात्री पिंपळगाव रेणुकाई परिसरात घडली. या प्रकरणी ज्ञानेश्वर आहेर यांच्या फिर्यादीवरून संशयित विष्णू नाटोबा क्षीरसागर, अनिल कौतिक आहेर (दोघे रा. पिंपळगाव रेणुकाई) यांच्याविरुद्ध पारध पोलीस ठाण्यात गुन्हा दाखल करण्यात आला आहे. पुढील तपास पोलीस करीत आहेत.

गावठी हातभट्टीच्या अड्ड्यावर छापा

जालना : जालना शहरातील कैकाडी मोहल्ला येथे सुरू असलेल्या गावठी हातभट्टी दारूच्या अड्ड्यावर छापा टाकून पोलिसांनी ४ हजार २०० रुपयांची दारू जप्त केली. या प्रकरणी पोलीस कॉन्स्टेबल चेके यांच्या फिर्यादीवरून एका महिलेविरुद्ध गुन्हा दाखल करण्यात आला आहे. पुढील तपास पोलीस करीत आहेत.

दुचाकीतून पेट्रोल चोरणारा अटकेत

जालना : घरासमोर उभा असलेल्या दुचाकीतून पेट्रोल काढणाऱ्यास रंगेहात पकडण्यात आल्याची घटना गुरुवारी अंबड तालुक्यातील रोहिलागड येथे घडली. या प्रकरणी केशव तट्टूपाटील यांच्या फिर्यादीवरून संशयित गजानन चैनसिंग गोलवाल (रा. हसनाबाद वाडी, जि. औरंगाबाद) याच्याविरुद्ध अंबड पोलीस ठाण्यात गुन्हा दाखल करण्यात आला आहे. पुढील तपास पोलीस करीत आहेत.