कलेक्टरसाहेब, निर्बंधाच्या वेळेतही शहरात दुकाने, हॉटेल्स आतून सुरू, बाहेरून बंद!

जालना : जिल्ह्यातील कोरोनाची स्थिती पाहता, शासनाने जालना शहरात चार वाजेपर्यंतच आस्थापना सुरू ठेवण्यास परवानगी दिलेली आहे. असे असले तरी निर्बंधांच्या वेळेतही सर्व काही उपलब्ध होत असल्याचे चित्र आहे. दुकाने, हॉटेल्स बाहेरून बंद दिसतात; परंतु, आतून बिनधास्तपणे आणि पूर्ण क्षमतेने सुरू असल्याचे दिसून आले. असे असताना जिल्हा प्रशासनाकडून मात्र याकडे दुर्लक्ष केले जात आहे. प्रशासनाकडून कारवाई करण्यात येत असल्याचे चित्र सध्यातरी कुठेच दिसून येत नाही.

या दुकानांवर लक्ष कोणाचे?

शहरात सर्रासपणे दुकाने उघडी दिसतात. त्यांच्यावर लक्ष ठेवण्याची जबाबदारी संबंधित पोलीस प्रशासन, नगरपालिका व नगरपंचायत आणि महसूल विभागाची आहे. परंतु, या कार्यालयांकडून दुकानांची तपासणीच केली जात नसल्याचे दिसत आहे. त्यामुळे शिथिल वेळेतही सर्रासपणे बाजारपेठेत गर्दी असल्याचे दिसते.

किराणा हवा की जेवण?

अत्यावश्यक सेवा वगळता इतर आस्थापना जालना शहरात दुपारी चार वाजताच बंद होणे अपेक्षित आहे. परंतु, रात्रभर ती चालूच असतात. हॉटेल्स पूर्ण क्षमतेने भरलेले असतात. तर किराणा दुकानेही सुरूच असतात. इतर आस्थापनादेखील अर्धे शटर उघडे ठेवून सुरू असल्याचे अनेक ठिकाणी पाहायला मिळाले.

भोकरदन नाका

जालना शहरातील भोकरदन नाका परिसरात सायंकाळी सात वाजेच्या सुमारास हॉटेल्स सर्रासपणे सुरू दिसली. तर दुकानेही सुरू होती.

औरंगाबाद चौफुली

शहरातील औरंगाबाद चौफुली परिसरात मोठ्या प्रमाणात हॉटेल्स आहेत. निर्बंधाच्या काळातही हे हॉटेल्स सुरू आहेत. याकडे प्रशासनाचे दुर्लक्ष होत असल्याचे दिसत आहे.