हृदयद्रावक! बुडणाऱ्या मुलाने बचावासाठी आलेल्या बापाला मिठी मारली; दोघांचाही मृत्यू

तब्बल एक तासानंतर दोन्ही मृतेदह बाहेर काढण्यास यश आले

जालना : पोहण्यासाठी गेलेल्या बाप-लेकाचा मृत्यू झाल्याची घटना जालना शहरातील मोतीतलावात मंगळवारी सायंकाळी पाच वाजेच्या सुमारास घडली. माणिक बापूराव निर्वळ (३८), आकाश माणिक निर्वळ (१४) अशी मयतांची नावे आहेत. या घटनेमुळे सर्वत्र हळहळ व्यक्त होत आहे.

माणिक निर्वळ हे पत्नी व तीन मुलांसह शहरातील एमआयडीसी परिसरात राहतात. एका कंपनीत काम करून ते आपल्या कुटुंबाचा उदरनिर्वाह करीत होते. मंगळवारी पाच वाजेच्या सुमारास ते मुलगा आकाश, रोहित, विकी यांच्यासोबत शहराजवळील मोतीतलावात पोहण्यासाठी गेले होते. आकाश हा पोहण्यासाठी तलावात गेला. माणिक निर्वळ व अन्य दोन मुले हे तलावाच्या काठाला पोहत होते. तेवढ्यात आकाश पाण्यात बुडाला. हे पाहताच माणिक निर्वळ त्याला वाचविण्यासाठी गेले. आकाशने त्यांना मिठी मारली. यात दोघेही बुडले. त्याचवेळी रोहित व विकी यांनी घराकडे धाव घेतली. त्यांनी याची माहिती नातेवाइकांना दिली.

नातेवाइकांनी घटनास्थळी धाव घेऊन पोलिसांना कळविले. माहिती मिळताच, चंदनझिरा पोलिसांनी घटनास्थळ गाठले. अग्निशमक दलाच्या जवानांना बोलावून शोधकार्य सुरू करण्यात आले. तब्बल एक तासानंतर दोन्ही मृतेदह बाहेर काढण्यात आल्याची माहिती पोलिसांनी दिली.मृतदेह शवविच्छेदनासाठी जिल्हा शासकीय रुग्णालयात पाठविण्यात आले. या प्रकरणी चंदनझिरा पोलीस ठाण्यात अकस्मात मृत्यूची नोंद करण्यात आली आहे. घटनास्थळी मोठ्या प्रमाणात नागरिकांनी गर्दी केली होती.