वडीगोद्रीजवळ भीषण अपघातात एक ठार, चौघे गंभीर जखमी 

कारला अज्ञात वाहनाने धडक दिली

ठळक मुद्देमृत आणि जखमी सर्वजण औरंगाबाद येथील रहिवासीकारच्या पाठीमागील भाग अक्षरश: चक्काचूर झाला.

वडीगोद्री (जालना) : अज्ञात वाहनाने कारला जोराची धडक दिल्याने झालेल्या अपघातात एकाचा मृत्यू झाला. तर चौघे गंभीर जखमी झाले. ही घटना शनिवारी पहाटे धुळे- सोलापूर राष्ट्रीय महामर्गावरील वडीगोद्री गावाजवळ घडली.

शिव पुरूषोत्तम अग्रवाल (१७ रा. औरंगाबाद) असे मयताचे नाव आहे.  शनिवार पहाटे कारने काही तरुण औरंगाबादकडे जात होते. वडीगोद्री गावाजवळ अज्ञात वहनाने कारला (क्र. एम. एच.२०-सी.यू्. ९७८६) पाठीमागून जोरदार धडक दिली. या अपघातात शिव पुरूषोत्तम अग्रवाल, कामील खान शब्बीर खान (१६), क्षितिज मनीष रणखांब (१६), ओम अग्रवाल वय १६), शेख मंजूर शेख बशीर (५२ सर्व रा. औरंगाबाद) हे पाच जण जखमी झाले.

अपघातानंतर स्थानिक नागरिकांनी भोकरवाडी येथील टोलनाक्यावरील रुग्णवाहिकाला बोलावून घेतली. रुग्णवाहिका चालक आप्पासाहेब गाडेकर, महेश जाधव, विठ्ठल गायकवाड यांनी तात्काळ घटनास्थळी दाखल होऊन जखमींना पाचोड येथील ग्रामीण रूग्णालयात उपचारासाठी दाखल केले. तपासणीनंतर डॉ. संदीपान काळे यांनी शिव अग्रवाल याला मयत घोषित केले. तर इतर चौघांवर उपचार सुरू आहेत. या अपघाताची गोंदी पोलीस ठाण्यात नोंद करण्यात आली आहे.

कार चक्काचूर
हा अपघात इतका भीषण होता की कारच्या पाठीमागील भाग अक्षरश: चक्काचूर झाला. स्थानिक नागरिकांनी जखमींना मदत करीत भोकरवाडी टोलनाक्यावरील रूग्णवाहिकेतून पाचोड रूग्णालयात उपचारासाठी दाखल केले. अपघातानंतर अज्ञात वाहन चालक फरार झाला.