जुगार अड्ड्यावर पोलिसांचा छापा

देऊळगाव राजा : देऊळगाव राजा- सिंदखेड राजा रस्त्यावरील पिंपळनेर शिवारात सुरू असलेल्या जुगार अड्ड्यावर स्थानिक गुन्हे शाखा व देऊळगाव राजा पोलिसांनी मंगळवारी छापा टाकला. यावेळी तीन लाख ६३ हजार ५०० रुपयांचा मुद्देमाल जप्त करण्यात आला.

देऊळगाव राजा -सिंदखेड राजा रोडवरील पिंपळनेर शिवारात काही जण जुगार खेळत असल्याची माहिती स्थानिक गुन्हे शाखा तसेच देऊळगाव राजा पोलिसांना मिळाली. या माहितीवरून पोलिसांनी सापळा रचून सदर जुगार अड्ड्यावर छापा मारला. यावेळी जुगार खेळत असलेल्या सात जणांना ताब्यात घेण्यात आले. विनोद गणेश मेहेत्रे, कोंडीबा रामभाऊ भोजने, सय्यद मोसिन सय्यद कट्टू (तिघे रा. सिंदखेड राजा), गुलाम नबी शेख नजीर (रा. जालना), दिलीप गणपत ढोबळे (रा. सावखेड भोई), सय्यद युसूफ सय्यद उस्मान, सिद्धांत आनंद खांडेभराड (दोघे रा. देऊळगाव राजा) या सात जणांना ताब्यात घेण्यात आले. पाच जण फरार झाल्याचे पोलिसांनी सांगितले. त्यांच्याकडून रोख रक्कम १ लाख १७ हजार ५०० रुपये, ७ मोबाइल, ६ दुचाकी असा ३ लाख ६३ हजार ५०० रुपयांचा मुद्देमाल जप्त करण्यात आला. याप्रकरणी बारा जणांविरुद्ध देऊळगाव राजा पोलीस ठाण्यात गुन्हा दाखल करण्यात आला. पुढील तपास देऊळगाव राजा पोलीस ठाण्याचे संभाजी पाटील, श्रीकृष्ण गवई करीत आहेत.