वाळू माफियाकडून दोन तलाठ्यांचे अपहरण

जप्त केलेले वाळूचे टिप्पर राजूर येथून तहसीलमध्ये घेऊन जाणाºया दोन तलाठ्यांचे वाळू माफियाने अपहरण केल्याची घटना भोकरदन तालुक्यात घडली. या तलाठ्यांना धावत्या वाहनातून ढकलून देण्याचाही प्रयत्न केला.

ठळक मुद्देग्रामस्थांच्या मदतीने केली सुटका

भोकरदन (जि. जालना) : जप्त केलेले वाळूचे टिप्पर राजूर येथून तहसीलमध्ये घेऊन जाणा-या दोन तलाठ्यांचे वाळू माफियाने अपहरण केल्याची घटना भोकरदन तालुक्यात घडली.  या तलाठ्यांना धावत्या  वाहनातून ढकलून देण्याचाही प्रयत्न केला. रविवारी सकाळी आठच्या सुमारास बरंजळा ठोंबरे ते जवखेडा ठोंबरे दरम्यान पंधरा किलोमीटर हा थरार सुरू होता. पोलीस व महसूल पथकाने ग्रामस्थांच्या मदतीने ट्रक अडवून तलाठ्यांची सुटका केली.

 तहसीलदार संगीता कोल्हे यांच्या पथकाने रविवारी सकाळी सातच्या सुमारास अवैध वाळू वाहतुकीवर कारवाई केली. यात राजूर चौफुलीवर त्यांनी एका टिप्परला (एमएच. २०, बीटी. १९२५ ) तीन ब्रास अवैध वाळूची वाहतूक करताना पकडले. चालकाने माहिती देण्यास टाळाटाळ केली. तहसीलदारांच्या सूचनेवरून  चालक संतोष शिंदेला घेऊन तलाठी भागवत जाधव व रामेश्वर कांबळे हे जप्त केलेल्या टिप्परला घेऊन भोकरदन  तहसीलकडे निघाले. काही अंतरावर अचानक एका जीपने  टिप्परचा रस्ता अडवला व त्यामधून आलेल्या सर्जेराव नामेदव चव्हाण ( रा. मानदेऊळगाव ता. बदनापूर ) याने दोन्ही तलाठ्यांना जिवे मारण्याची धमकी देत खाली उतरण्यास सांगितले. दोन्ही तलाठी धमकीला न जुमानता  टीपरमध्येच बसून राहिले. यामुळे संतापलेल्या त्या व्यक्तीने चालकाला खाली उतरवत टिपरचा ताबा घेतला.

भरधाव टिप्परला बरंजळा रोडवर नेले. या दरम्यान तहसीलदार संगीता कोल्हे यांचे पथक टिप्परचा पाठलाग करत होते. तहसीलदार कोल्हे यांनी फोनवरून सदर प्रकाराची माहिती हसनबााद ठाण्याचे साहाय्यक निरीक्षक किरण बिडवे यांनी दिली. पोलीस व महसूल पथकाने टिप्परचा पंधरा किलोमीटर पाठलाग केला. भरधाव टिप्परने जवखेडा ठोंबरे या गावाजवळ एका दुचाकीस्वारास हूल दिली, पुढे एका मुलीला व बैलगाडीला उडवण्याचा प्रयत्न केला.

याच दरम्यान टिपरमधील वाळू रस्त्यावर टाकत चालकाने वेग वाढवला. दोन्ही तलाठ्यांनी मोबाईलवरून तहसीलदार कोल्हे यांना संपर्क करण्याचा प्रयत्न केला असता चालकाने त्यांना शिवीगाळ करत, मी टिप्पर खड्ड्यात घालून उडी मारेल व तुम्हाला जीव मारेल, तुमच्या तहसीलदारांनाही जीवे मारेल अशी धमकी दिली. तसेच त्यांना टिप्परमधून खाली ढकलण्याचा प्रयत्न केला.

हा सर्व प्रकार लक्षात येताच बालाजी लोखंडे या ग्रामस्थाने   जवखेडा ग्रामस्थांना सावध केले. ग्रामस्थांनी रस्त्यावर उभे राहत टिप्पर चालकास थांबण्याचा इशारा केला. मात्र, चालकाने ग्रामस्थांच्या अंगावर टिप्पर घालण्याचा प्रयत्न केला. ग्रामस्थांनी रस्त्यावर दगड टाकलेले असल्याने टिपर पुढे जाऊ शकला नाही. यानंतर कोल्हे यांचे वाहनही पाठलाग करत तिथे पोहचले.

त्यांनी ग्रामस्थांच्या मदतीने चालकाला ताब्यात घेतले व त्याच वेळी पोहचलेल्या  सहाय्यक पोलीस निरीक्षक आर.एस. सिरसाट यांच्या पथकाच्या स्वाधीन केले. यानंतर चालक सर्जेराव नामेदव चव्हाण ( रा. मानदेऊळगाव ता. बदनापूर ) याला भोकरदन पोलीस ठाण्यात नेले. या प्रकरणी तहसीलदार कोल्हे यांच्या फिर्यादीवरून संशयित चव्हाणविरुद्ध जिवे मारण्याचा प्रयत्न करणे, शासकीय कामात अडथळा आणि अवैध गौण खनिज वाहतूक करणे या कलमांनुसार गुन्हा दाखल करण्यात आला आहे.