भरधाव ट्रॅक्टरच्या धडकेत बैल जोडी ठार; वाळू माफियांसह पोलीस प्रशासनाविरोधात ग्रामस्थांचा संताप

तालुक्यातील आव्हाणे रस्त्यालगत उभ्या असलेल्या बैलगाडीला जळगावकडून येणाऱ्या वाळूच्या ट्रॅक्टरने दिलेल्या जोरदार धडकेत, दोन्ही बैलांचा जागीच मृत्यू झाल्याची दुर्दैवी घटना

जळगाव :

तालुक्यातील आव्हाणे रस्त्यालगत उभ्या असलेल्या बैलगाडीला जळगावकडून येणाऱ्या वाळूच्या ट्रॅक्टरने दिलेल्या जोरदार धडकेत, दोन्ही बैलांचा जागीच मृत्यू झाल्याची दुर्दैवी घटना शुक्रवारी सकाळी ९.३० वाजता घडली. गरीब शेतकऱ्याची जोडी वाळूच्या ट्रॅक्टरच्या धडकेत ठार झाल्यानंतर संतप्त आव्हाणे ग्रामस्थांनी कानळदा रस्त्यालगत काही काळ रास्तारोको केला. तसेच जिल्हा प्रशासन व पोलीस प्रशासनाविरोधात जोरदार घोषणाबाजी केली.
बऱ्याच वेळ सुरु असलेल्या गोंधळानंतर हे आंदोलन मागे घेण्यात आले. शुक्रवारी सकाळी ९ वाजता आव्हाणे येथील दगडू धनगर हे मुलगा रावसाहेब धनगर यांच्यासोबत शेतातील पिकांना खतं देण्यासाठी बैलगाडीने रासायनिक खते घेऊन शेतात आले होते.

बैलगाडी रस्त्याच्या कडेला उभी करून, दोन्ही बाप-लेकं बैलगाडीत ठेवलेल्या खतांच्या गोण्या उतरवत होते. सकाळी ९.३० वाजता, रस्त्याच्या बाजुला उभी असलेल्या बैलगाडीला जळगावकडून गिरणा नदीत वाळू भरण्यासाठी भरधाव वेगात जाणाऱ्या ट्रॅक्टरने बैलगाडीला जोरदार धडक दिली. या धडकेत दोन्ही बैलांचा जागीच मृत्यू झाला.