बाहेरगावाहून घरी परतल्यानंतर मध्यरात्री शेतमजूराने संपविली जीवनयात्रा; खेडी-कढोली येथील घटना

घरामागे दिसला रहिवाशांना मृतदेह

जळगाव : अमळनेर येथून घरी परतल्यानंतर खेडी-कढोली (ता.एरंडोल) येथील ज्ञानेश्वर रमेश कोळी (३५) या शेतमजूराने बुधवारी मध्यरात्री विष प्राशन करून आत्महत्या केली. ही घटना गुरूवारी सकाळी ७ वाजता रहिवाशांना घरामागे कोळी यांचा मृतदेह दिसून आल्यानंतर उघडकीस आली. दरम्यान, आत्महत्येचे कारण समजून आलेले नसून या प्रकरणी पोलिसात अकस्मात मृत्यूची नोंद करण्यात आली आहे.

ज्ञानेश्वर कोळी हे पत्नी व दोन मुलांसह वास्तव्याला होते. शालकाच्या मुलीच्या लग्नानिमित्त कोळी हे कुटूंबियांसह अमळनेर येथे गेले होते. बुधवारी रात्री ९ वाजता ते एकटेच खेडी-कढोली येथे परत आले. पत्नी आणि दोन्ही मुले अमळनेर येथे थांबले होते. मध्यरात्री कोळी यांना विषारी औषध प्राशन करून आत्महत्या केली. गुरूवारी सकाळी ७ वाजेच्या सुमारास शेजारच्यांना कोळी हे त्यांच्या घरामागे मृतावस्थेत दिसून आले. ही माहिती बाब त्यांनी त्यांच्या कुटूंबियांना सांगितली. त्यानंतर ग्रामस्थ व नागरिकांच्या मदतीने कोळी यांचा मृतदेह जिल्हा रूग्णालयात आणण्यात आला. याठिकाणी वैद्यकीय अधिका-यांनी त्यांना तपासणीअंती मृत घोषित केले. आत्महत्येचे कारण गुलदस्त्यात असून शवविच्छेदनानंतर मृतदेह कुटूंबियांच्या ताब्यात देण्यात आला होता.