जळगावनजीक महामार्गावर पुन्हा अपघात, साकेगावचा प्रौढ ठार

जोरदार धडक

जळगाव/साकेगाव : महामार्गावरील भाऊंच्या ढाब्याजवळ एका चारचाकी वाहनाच्या धडकेत भगवान प्रल्हाद कोळी (वय-४५, रा़ साकेगाव, ता़ भुसावळ) हा दुचाकीस्वार जागीच ठार झाल्याची घटना शुक्रवारी रात्री साडे सात वाजता घडली़ या घटनेमुळे साकेगावात शोककळा पसरली.
भगवान कोळी हे काही कामानिमित्त शुक्रवारी सायंकाळी दुचाकीने जळगावी येण्यासाठी साकेगाव येथून निघाले होते़ रात्री ७़३० वाजेच्या सुमारास जळगाव- भुसावळ महामार्गावरील गोदावरी हॉस्पीटलच्यानजीकच्या भाऊंच्या ढाब्याजवळून जात असताना त्यांना भरधाव चारचाकी वाहनाने जोरदार धडक दिली़ यात भगवान कोळी यांचा जागीच मृत्यू झाला़
ही घटना कळताच नागरिकांनी त्या ठिकाणी धाव घेतली व कोळी यांची ओळख पटवून त्यांच्या नातेवाईकांना संपर्क साधला़
त्यानंतर कोळी यांना त्वरीत जिल्हा रूग्णालयात नेण्यात आले़ वैद्यकीय अधिकाऱ्यांनी तपासणीअंती त्यांना मयत घोषित केले़
दरम्यान, मृतदेह शवविच्छेदन गृहात ठेवण्यात आला असून शवविच्छेदन शनिवारी सकाळी करण्यात येणार आहे़
तसेच भगवान कोळी हे चालक होते. त्यांच्या पश्चात आई-वडील, पत्नी, एक मुलगा, मुलगी तसेच चार भाऊ असा परिवार आहे़