खासगी मक्तेदाराच्या अपयशानंतर, आता आयआरटीसी मैदानात...

जळगाव : तीन वर्षांपूर्वी आयआरटीसीने खासगी मक्तेदारामार्फत येथील रेल्वे स्थानकावर कॅन्टिनची उभारणी केली होती. मात्र, अत्यंत महागड्या पदार्थांमुळे प्रवाशांचा अत्यल्प प्रतिसाद मिळत असल्याने वर्षभरातच हे कॅन्टिन गुंडाळण्यात आले. कॅन्टिन चालविण्यात खासगी मक्तेदार अपयशी ठरल्यानंतर आता ‘आयआरटीसी’ने घरगुती पद्धतीचे जेवण ठेवण्याचा निर्णय घेऊन स्वत: कॅन्टिन चालविण्याचा निर्णय घेतला आहे.

भुसावळप्रमाणे जळगाव रेल्वे स्थानकावरही बहुतांश गाड्यांना थांबा आहे. तसेच जिल्ह्याचे ठिकाण असल्याने रात्रभर प्रवाशांची वर्दळ असते. दरम्यान, बाहेरगावी जाणाऱ्या प्रवाशांना किंवा गाडीमधून प्रवास करणाऱ्या प्रवाशांना प्रवासात घरगुती पद्धतीचे जेवण मिळण्याची शक्यता कमीच असते. त्यामुळे प्रवाशांची ही गरज भागविण्यासाठी ‘आयआरटीसी’तर्फे रेल्वे स्थानकावर कॅन्टिनची उभारणी करण्यात येत आहे. प्लॅटफार्म क्रमांक तीनवर कॅन्टिनचे ५० टक्के काम पूर्ण झाले असून, यानंतर फर्निचरचे काम हाती घेण्यात येणार आहे. मार्चअखेर प्रवाशांच्या सेवेत कॅन्टिनची सुविधा सुरू करण्याचे रेल्वे प्रशासनाचे नियोजन आहे.

घरगुती पद्धतीचे मिळणार जेवण :

रेल्वे प्रशासनातर्फे या कॅन्टिनमध्ये वडापाव, समोसा, इडली, भजी, चहा, विविध प्रकारची थंड पेये, बिस्किटे यासह घरगुती पद्धतीचे भाजी-पोळीचे जेवणही मिळणार आहे. प्रवासातील नागरिकांना आयआरटीसीच्या वेबसाईटवरून जेवणाची आर्डर दिल्यानंतर जळगाव स्थानक येईपर्यंत तयार जेवण मिळणार आहे. विशेष म्हणजे पार्सलची सुविधाही देण्यात येणार आहे. दरम्यान, कॅन्टिनवरील इतर पदार्थ व जेवणाचे दर काय असणार, याबाबत सध्या माहिती नसल्याचे रेल्वेच्या सुत्रांनी सांगितले.

यापूर्वीचे कॅन्टिन वर्षभरातच बंद :

जळगाव रेल्वे स्थानकावर तीन वर्षांपूर्वी खासगी मक्तेदारामार्फतच प्लॅटफार्म क्रमांक तीनवरच एक कॅन्टिन उभारण्यात आले होते. सुरूवातीला या कॅन्टिनला प्रवाशांचा उत्स्फूर्त प्रतिसाद मिळाला. मात्र, येथील अन्न पदार्थ महागडे असल्यामुळे कालांतराने प्रवाशांनी या कॅन्टिनकडे पाठ फिरवली. प्रवाशांचा अल्प प्रतिसाद मिळत असल्यामुळे हे कॅन्टिन वर्षभरातच बंद पडले होते. तर आता नवीन कॅन्टिनही याच जागेवर उभारण्यात येत आहे.