आनंदनगर तांड्याचा पाणीप्रश्न सुटणार

निपाणे, ता. एरंडोल : आनंदनगर तांडा या गावासाठी ८२ लाख रुपयांची पाणीपुरवठा योजना मंजूर करण्यात आली असून लवकरच याची निविदा निघणार असल्याची घोषणा पालकमंत्री गुलाबराव पाटील यांनी केली. यामुळे या ठिकाणचा पाणी प्रश्न सुटणार आहे.

आनंदनगर तांडा येथे पालकमंत्री गुलाबराव पाटील यांच्या उपस्थितीत सत्कार समारंभ पार पडला. गुलाबराव पाटील यांचा हा जुना मतदारसंघ असल्यामुळे जुने पदाधिकारी व कार्यकर्ते या कार्यक्रमाला आवर्जून उपस्थित होते. याप्रसंगी गुलाबराव पाटील यांनी जुन्या आठवणींना उजाळा देत १५ लाखांचे सभामंडप व आनंद नगर ते ताडे फाटा रस्ता व नाल्यावर फरशी आदी कामेही मंजूर करणार असल्याची ग्वाही दिली.

आमदारांच्या अनुपस्थितीची चर्चा

या कार्यक्रमाला एरंडोल पारोळा मतदारसंघाचे आमदार चिमणराव पाटील, जळगाव जिल्हा परिषद माजी उपाध्यक्ष ज्ञानेश्वर आमले, जिल्हा परिषद सदस्या वैशाली गायकवाड, पंचायत समिती सभापती शांताबाई महाजन, उपसभापती अनिल महाजन तसेच आमदार चिमणराव पाटील यांचे अनेक समर्थक अनुपस्थित होते. हा विषय परिसरात चर्चेचा ठरला आहे.

यावेळी ग्रामपंचायत व ग्रामस्थांनी पालकमंत्री गुलाबराव पाटील यांचा सत्कार केला. तर गुलाबराव पाटील यांनी ज्येष्ठांचा व शिफारस केलेल्या तालुक्यातील विविध समित्यांवर निवड करण्यात आलेल्यांचा सत्कार केला.

या प्रसंगी शिवसेनेचे लोकसभा सहसंपर्क प्रमुख गुलाबराव वाघ, शिवसेनेच्या महिला आघाडी जिल्हाप्रमुख महानंदा पाटील, तालुकाप्रमुख वासुदेव पाटील, विधानसभा क्षेत्रप्रमुख जगदीश पाटील, उपतालुका प्रमुख रवि चौधरी, माजी सभापती दत्तू पाटील, युवासेनेचे परमेश्वर राठोड, नायब तहसीलदार शिरसाठ, सरपंच गजानन राठोड, तळई -उत्राण गटाचे गटविभाग प्रमुख देशमुख राठोड, सेठाणी राठोड, कृषी उत्पन्न बाजार समितीचे माजी संचालक गजानन पाटील, माजी उपसरपंच ज्ञानेश्वर बडगुजर, गालापूर सरपंच महेंद्र महाजन, हणुमंतखेडेसिम सरपंच विनोद पाटील, गालापूर माजी सरपंच अरिफ शेख, ताडे माजी सरपंच शांताराम पाटील यांच्यासह परिसरातील शाखा प्रमुख पदाधिकारी व ग्रामस्थ उपस्थित होते.

फोटो : २९ एचएसके 02

गुलाबराव पाटील यांचा सत्कार करताना. सोबत महानंदा पाटील व इतर पदाधिकारी.