गोंधळाचा कार्यक्रम आटोपून परतताना अज्ञात वाहनाच्या धडकेत रिक्षाचालक ठार

जळगाव : राष्ट्रीय महामार्गावर वाटिकाश्रमजवळ भरधाव वेगाने येणाऱ्या अज्ञात वाहनाने धडक दिल्याने भरत रामचंद्र सोनवणे (वय ५०, रा. कांचन नगर) हे रिक्षाचालक ठार झाल्याची घटना सोमवारी सकाळी उघडकीस आली. याप्रकरणी तालुका पोलिसात गुन्हा दाखल करण्यात आला.

सूत्रांनी दिलेल्या माहितीनुसार, भरत रामचंद्र सोनवणे हे रिक्षा चालवून आपल्या कुटुंबीयांचा उदरनिर्वाह करायचे. राष्ट्रीय महामार्गावरील वाटिकाश्रम येथे राहणारे मित्र मगन काळे यांच्याकडे गोंधळाचा कार्यक्रम रविवारी सायंकाळी ठेवण्यात आला होता. यावेळी गोंधळाचा कार्यक्रम आटोपून ते कांचन नगरात जाण्यासाठी रात्री ११ वाजता पायी निघाले होते. राष्ट्रीय महामार्गावर जात असतांना मागून भरधाव वेगाने जाणाऱ्या अज्ञात वाहनाने जोरदार धडक दिल्याने ते गंभीर जखमी झाले. त्यांना तातडीने खासगी रुग्णालयात उपचारार्थ दाखल करण्यात आले होते. रात्री उशिरापर्यंत उपचार सुरू असतांना त्यांचा मृत्यू झाला. त्याच्या पश्चात पत्नी कल्पना, ललित व घनश्याम हे दोन मुले आणि विवाहित मुलगी असा परिवार आहे. याप्रकरणी तालुका पोलीस ठाण्यात अज्ञात वाहनचालकाविरुध्द गुन्हा दाखल करण्यात आला आहे. प्राथमिक तपास हवालदार गुलाब पाटील करीत आहे.