"बाळासाहेब तुमची स्वतःची प्रॉपर्टी नाही"; गुलाबराव पाटील उद्धव ठाकरेंवर बरसले

मंत्री पाटील हे सोमवारी सकाळी त्यांच्या पाळधी येथील निवासस्थानी माध्यमांशी बोलत होते. यावेळी ते बोलत होते.

- प्रशांत भदाणे

जळगाव : "बाळासाहेब तुमची स्वतःची प्रॉपर्टी नाही. मान्य आहे ते उद्धव ठाकरेंचे वडील आहेत. पण ते या देशाची आणि हिंदू समाजाची प्रॉपर्टी आहे. त्यामुळे त्यांचं नाव कुणीही वापरेल, अशा शब्दांत पाणीपुरवठा मंत्री गुलाबराव पाटील यांनी उद्धव ठाकरेंवर बरसले आहेत.

मंत्री पाटील हे सोमवारी सकाळी त्यांच्या पाळधी येथील निवासस्थानी माध्यमांशी बोलत होते. यावेळी ते बोलत होते. ठाकरे गटाचे नेते उद्धव ठाकरेंनी काल कोकणातील खेडच्या सभेत शिंदे गटावर जोरदार टीका केली होती. त्यांच्या टीकेला गुलाबराव पाटील यांनी जोरदार प्रत्युत्तर दिलंय. 

नेमकं काय म्हणाले गुलाबराव?

गुलाबराव पाटील म्हणाले की, बाळासाहेबांच्या नाव वापरू नका हे उद्धव ठाकरे शिंदे गटाला उद्देशून पाचव्या सहाव्या वेळेस बोलले आहेत. त्यामुळे त्या गोष्टीला किती धार द्यावी, हे मला तरी वाटतं चुकीचं होईल. महापुरुषांचे फोटो, नाव वापरणं हा प्रत्येकाचा अधिकार आहे. बाळासाहेब हे त्यांची स्वतःची प्रॉपर्टी नाही. मान्य आहे ते त्यांचे वडील आहेत. पण ते या देशाची आणि हिंदू समाजाची प्रॉपर्टी आहे. त्यामुळे त्यांचं नाव कुणीही वापरेल, असं ते म्हणाले. उद्धव ठाकरेंसोबत मी 35 वर्षे राहिलो आहे. त्यांचे शब्द प्रयोग मला माहिती आहेत. त्यामुळे आम्ही रक्त पिणारे नाही तर रक्त देणारे ढेकूण आहोत, असा चिमटा देखील त्यांनी उद्धव ठाकरे यांना काढला.

ठाकरे गटाला दिल्या होळीच्या शुभेच्छा -

यावेळी गुलाबराव पाटील यांनी ठाकरे गटाला होळीच्या शुभेच्छा दिल्या. ते म्हणाले की, होळीच्या दिवशी आपण रागाच्या दुःखाच्या सगळ्या गोष्टी होळीत टाकत असतो. आज आपल्याला मागच्या सगळ्या गोष्टी विसरायच्या आहेत. बुरा न मानो होली हैं... मी माझ्या मित्रांना आणि विरोधकांना होळीच्या शुभेच्छा देतो. विचारांची ही लढाई आहे. या लढाईत फरफटत गेलेला विचार हा यशस्वी शिखरापर्यंत नेत नाही. मूळ बेस आपला हिंदुत्व आहे, तो बेस सोडल्यामुळे हा प्रोब्लेम उभा राहिला आहे. तरी पण होळीच्या दिवशी मला वाईट बोलण्याची मानसिकता नाही, असं म्हणत गुलाबराव यांनी ठाकरे गटाला आणि ठाकरे गटाच्या नेत्यांना होळीच्या शुभेच्छा दिल्या.