भुसावळच्या वृद्धाचा तापीत बुडून मृत्यू

एक दिवस आधी झाले होते बेपत्ता

भुसावळ : १२ रोजी घरातून कोणासही न सांगता निघून गेलेल्या कोळीवाड्यातील वृद्धाचा तापी नदीच्या पात्रात १३ रोजी सकाळी १० वाजेच्या सुमारास मृतदेह आढळला. तापी नदी पात्राजवळ असलेल्या स्मशानभूमीचा रखवालदार अरुण रंधे यांना अज्ञात इसमाचा मृतदेह दिसून आल्याने त्यांनी ही माहिती शहर पोलिसांना कळवताच पोलीस कर्मचारी अनिल चौधरी, जाकिर सैयद, पोलीस नाईक सुनील सैंदाणे यांनी त्वरित घटनास्थळी धाव घेतली असता सुधाकर फकीरा कोळी (६२) यांचा हा मृतदेह असल्याचे निष्पन्न झाले.
कोळी यांची पोस्ट व्हायरल
फकीरा कोळी हे दोन-तीन वेळा घरात न सांगता निघून गेले होते. १२ रोजी ही दुपारपासून ते कोणासही काही न सांगता घरून निघून गेले होते. याबाबत जुना सातारा येथील युवकांनी त्यांच्या फोटोची पोस्ट सोशल मीडियावर शेअर केली व फकीरा हे दिसून आल्यास कळविण्याची विनंती केली होती. मात्र दुसऱ्या दिवशीच त्यांचा मृतदेह दिसून आला. ही आत्महत्या की घातपात हे मात्र गुढ आहे.
तिसरी दुर्दैवी घटना
जुना सातारा कोळी वाडा येथे २ मार्च रोजी दूध व्यवसायिक नसीर पटेल यांचा खून झाला होता, यानंतर वेदांत मालखेडे या अवघ्या साडेतीन वर्षाच्या चिमुकल्याचा कुत्र्याच्या चाव्याने मृत्यू झाला. आता सुधाकर कोळी यांचे मृतदेह आढळला. यांच्या पश्चात दोन मुली, एक मुलगा, पत्नी असा परिवार आहे.