भाजप आमदार सावकारे राष्ट्रवादीच्या वाटेवर

Sanjay Savkare News : भुसावळ  येथील भाजपचे आमदार संजय सावकारे यांच्या वाढदिवसानिमित्त शहरात लावण्यात आलेले बॅनर, पोस्टर व सोशल मीडियावर देण्यात आलेल्या जाहिरातींमध्ये  भाजपचे चिन्ह असलेले ‘कमळ’ गायब

भुसावळ :  येथील भाजपचे आमदार संजय सावकारे यांच्या वाढदिवसानिमित्त शहरात लावण्यात आलेले बॅनर, पोस्टर व सोशल मीडियावर देण्यात आलेल्या जाहिरातींमध्ये  भाजपचे चिन्ह असलेले ‘कमळ’ गायब असून नुकतेच राष्ट्रवादी काँग्रेसमध्ये प्रवेश केलेले एकनाथ खडसे यांचा प्रभाव दिसून येत असल्यामुळे आमदार सावकारे हेही राष्ट्रवादीत जाण्याचे संकेत मिळत आहेत.  

आमदार सावकारे यांच्या वाढदिवसानिमित्त शहर व तालुक्यात लावण्यात आलेल्या बॅनरवर माजी  मंत्री खडसे, खासदार रक्षा खडसे यांच्यासह काही ठिकाणी भाजप जिल्हाध्यक्ष सुरेश भोळे व जिल्हा बँकेच्या चेअरमन रोहिणी खडसे यांचे फोटो दिसत आहेत.  मात्र या बॅनर व शुभेच्छा जाहिरातींमध्ये भाजपची निशाणी कमळासह प्रदेशाध्यक्ष चंद्रकांत पाटील, विरोधी पक्षनेते तथा माजी मुख्यमंत्री देवेंद्र फडणवीस, जिल्ह्यातील भाजपचे नेते माजी मंत्री गिरीश महाजन यांचा कुठेही फोटो  नसल्यामुळे आमदार सावकारे हे खडसेंसोबतच आहेत की काय, असा प्रश्न उपस्थित झाला आहे.