प्रेम सिद्ध करण्यासाठी तिने केले स्वत:वर वार

पीडितेने प्रियकराला पाठविला व्हिडीओ

जळगाव : प्रेम सिद्ध करण्यासाठी पुण्याच्या एका १६ वर्षीय मुलीने ब्लेडने हाताच्या शिरा, मांडीवर वार करून घेत त्याचा व्हिडीओ तयार करुन प्रियकराला पाठविला. मात्र लग्नास नकार दिल्याने गौरव रुपा चंदनकर (२०, रा.बळीराम पेठ, जळगाव) या तिच्या प्रियकरावर पुण्यात बलात्काराचा गुन्हा नोंदवून रविवारी त्याला जळगावातून अटक करण्यात आली.

बळीराम पेठेत वडापावच्या दुकानावर कामाला असलेल्या गौरव याचे पुणे शहरातील बिबवेवाडी येथील अकरावीच्या वर्गात शिक्षण घेणाऱ्या १६ वर्षांच्या मुलीशी सूत जुळले. गौरव याने लग्नाचे आमिष दाखवून दोन वेळा तिच्यावर एका लॉजमध्ये अत्याचार केले. पीडितेने वार करून घेतल्यानंतर हा प्रकार उघडकीस आला. त्यानंतर गौरवविरुद्ध बिबवेवाडी पोलीस ठाण्यात शनिवारी बलात्कार व बाललैंगिक अत्याचाराचा गुन्हा नोंदविण्यात आला.

प्रियकराने सांगितले...
तुझे माझ्यावर प्रेम असेल तर हात कापून घे व त्याची शुटींग करुन मला व्हिडीओ पाठव असे गौरवने पीडितेला सांगितले. प्रेमात आकंठ बुडालेल्या पीडितेने स्वत:च्या शरीरावर ब्लेडने वार करुन त्याचा व्हिडीओ केला व तो गौरवला पाठविला. हा प्रकार पाहिल्यानंतर पीडितेच्या आईला धक्काच बसला, त्यांनी थेट पोलीस स्टेशन गाठून तक्रार नोंदविली.