पाचोऱ्यात भरदिवसा धाडसी चोरी, पावणेदोन लाखांचा ऐवज लंपास

यशोदानगर भागात भरदुपारी अज्ञात चोरट्यांनी पावणेदोन लाखाचा ऐवज लंपास केला.

ठळक मुद्देलाकडी दरवाजाचे कुलूप तोडून दागिनेही लांबवले

लोकमत न्यूज नेटवर्क

पाचोरा : शहरातील यशोदानगर भागात दि. ५ रोजी भरदुपारी अज्ञात चोरट्यांनी घरी कुणी नसल्याचा गैरफायदा घेत लाकडी दरवाजाचे कुलूप तोडून घरातील कपाटात असलेले सोन्या-चांदीचे दागिने यासह रोख रक्कम लंपास केल्याची घटना घडली.

शहरातील विनोद दीपचंद बोथरा (यशोदानगर, पाचोरा) हे त्यांच्या कुटुंबासह बाहेरगावी कासमपुरा येथे खासगी वाहनाने गेले होते. त्याचा गैरफायदा घेत अज्ञात चोरट्यांनी भरदुपारी वस्तीतील विनोद बोथरा यांच्या घराच्या दरवाजाचे कुलूप तोडले व कपाटाच्या लॉकरमधील एका अल्युमिनियमच्या पेटीतील सोन्या-चांदीचे दागिने व रोख रक्कम हडप केली. यात ३.७५ तोळ्याची सोन्याची मंगलपोत, ५ हजार किमतीचे तीन जोड चांदीचे पैंजण, २० हजार रोख असा १ लाख ७५ हजार रुपयांचा ऐवज चोरट्यांनी चोरून नेला. याप्रकरणी पाचोरा पोलिसात अज्ञात चोरट्याविरुद्ध गुन्हा दाखल झाला आहे.