कुºहे पानाचे येथे बुडाली बैलगाडी

एका बैलाचा मृत्यू : महिला सुदैवाने बचावली

भुसावळ : तालुक्यातील कुºहे पानाचे येथे बैलांना पाणी पाजण्यासाठी लघु पाटबंधारे प्रकल्पाच्या किनारी उभी असलेली गाडी बैलांनी प्रकल्पात ओढत नेल्यामुळे एका बैलाचा मृत्यू झाला . तर सुदैवाने शेतकऱ्यांसह महिलेचा जीव वाचला. ही घटना गुरुवारी दुपारी घडली.
कुºहे पानाचे येथील शेतकरी समाधान कालु पाटील हे खंडाळा रोडवरून शेतातून घरी येत असताना दुपारी दोन वाजेच्या सुमारास लघु पाटबंधारे प्रकल्पावर बैलांना पाणी पाजण्यासाठी त्यांनी गाडी थांबवली. यावेयी गाडीला जुंपलेले बैल सोडत असताना बैलांनी अचानक पाण्याकडे ओढ घेतली. त्यामुळे बैलगाडी सरळ प्रकल्पात गेली. यावेळी बैलगाडीवर एक महिला बसलेली होती. महिलेने आरडाओरड केली असता शेजारील शेतात उपस्थित असलेले डॉ. रमाकांत पाटील, बाजीराव पाटील यांच्यासह अन्य शेतकऱ्यांनी घटनास्थळी धाव घेतली व महिलेचे प्राण वाचवण्यात यश मिळवले . मात्र या घटनेत एका बैलाचा मृत्यू झाला.
बैलगाडी प्रकल्पात बुडाल्याची माहिती समजतात ग्रामस्थांनी घटनास्थळी धाव घेतली. मात्र तोपर्यंत एका बैलाचा मृत्यू झाला होता. दरम्यान, मृत बैलाचा पंचनामा करण्यात आला. यावेळी सरपंच रामलाल बडगुजर ग्रामपंचायत माजी सदस्य सुभाष पाटील, कोतवाल प्रकाश आहिर , पशुवैद्यक संदीप टोंगळे आदी उपस्थित होते.