चाळीसगावला जिल्हा परिषद, पंचायत समिती निवडणुकांसाठी मातब्बरांचा लागणार कस

चाळीसगाव : ‘मिनी मंत्रालय’ असे वलय असणाऱ्या जिल्हा परिषद व पंचायत समितींची मुदत अनुक्रमे २० व १३ मार्च २०२२ रोजी संपत असल्याने निवडणुकांसाठी गट व गणांची माहिती संकलित करण्यात येत आहे. जिल्हा प्रशासनाने ग्रामीण भागातील लोकसंख्येची आकडेवारी तहसीलकडून मागवली असून, अगामी काळात होणाऱ्या या घमासानासाठी मातब्बरांचा कस लागणार, हे स्पष्ट आहे. २०११च्या लोकसंख्येनुसारच आरक्षणही जाहीर होण्याची शक्यता असल्याने याबाबतही राजकीय क्षेत्रासह गावपातळीवर औत्सुक्य आहे.

जिल्हा परिषद आणि १५ पंचायत समितींची मुदत अनुक्रमे २० व १३ मार्च २०२२ रोजी संपत आहे. जिल्हा परिषदेत ६७ गट, तर पंचायत समितींचे १३४ गण आहेत. तालुकानिहाय ग्रामीण भागातील लोकसंख्या प्रमाणित प्रपत्रामध्ये जिल्हा प्रशासनाकडून मागविण्यात आली आहे. चाळीसगाव तहसील प्रशासनालादेखील ४ जून रोजी असे पत्र प्राप्त झाले असून, प्रपत्रामध्ये लोकसंख्येची माहिती पाठविण्यात आल्याची माहिती तहसीलच्या सूत्रांनी दिली.

...............

चौकट

सर्वपक्षीयांसाठी सामना चुरशीचा

२०१४च्या विधानसभा निवडणुकीनंतर आणि २०१९च्या लोकसभा व विधानसभा निवडणुकीच्या आधी म्हणजेच २०१६ला या मिनी मंत्रालयांची रणधुमाळी झाली आहे. साहजिकच गत सव्वाचार वर्षात राजकारणाच्या पुलाखालून नवनवीन समीकरणांचे बरेच पाणी वाहून गेले आहे. २०२२मध्ये होऊ घातलेले घमासान म्हणूनच सर्वपक्षीयांसाठी चुरशीचेच ठरणार आहे.

- जिल्हा परिषदेच्या सात गटात राष्ट्रवादी भाजपपेक्षा वरचढ ठरला आहे. सातपैकी चार जागांवर राष्ट्रवादीच्या घड्याळाचा गजर झाला तर तीन जागांवर भाजपचे कमळ उमलेले होते.

- बहाळ - कळमडू, सायगाव - उंबरखेडे, रांजणगाव - पिंपरखेड, तळेगाव - देवळी हे चार गट राष्ट्रवादीने राखले होते. भाजपने दहिवद - मेहुणबारे, टाकळी प्र.चा. - करगाव, वाघळी - पातोंडा यागटांमध्ये मुसंडी मारली होती.

- या सात गटांपैकी अनु. जमाती, ना.मा.प्र.महिला असे दोन गट महिलांसाठी राखीव आहे.

- सर्वसाधारण प्रवर्गाचे तीन, तर ना.मा.प्र.चे दोन अशी आरक्षणाची स्थिती आहे.

...........

चौकट

आरक्षणाबाबत मोठी उत्सुकता

ओबीसींच्या आरक्षणाचे त्रांगडे तसेच असल्याने निवडणुकांचा बिगूल वाजण्यापूर्वी जाहीर होणाऱ्या आरक्षणाबाबतही मोठी उत्सुकता आहे. आरक्षणानंतरच खरी स्थिती स्पष्ट होईल. अर्थात मातब्बरांकडून आतापासूनच ‘सेफ झोन’ची चाचपणी केली जात आहे. २०२४ मध्ये होणाऱ्या लोकसभा व विधानसभा रणधुमाळीसाठी जिल्हा परिषद व पंचायत समिती निवडणूक ही रंगीत तालीम ठरणार आहे. आरक्षण जाहीर झाल्यानंतर नव्याने समीकरणे अस्तित्वात येतील.

..............

चौकट

----

1...कळमडू, सायगाव, उंबरखेड, रांजणगाव, पिंपरखेड, देवळी, तळेगाव या सात गणांमध्ये राष्ट्रवादीने विजयी गुलाल उधळला.

2...भाजपने बहाळ, पातोंडा, दहिवद, मेहुणबारे, करगाव, टाकळी प्र.चा., वाघळी हे सात गण काबीज केले होते.

3...सामना बरोबरीत सुटला असला तरी, पहिल्या टर्ममध्ये सभापती, उपसभापती निवडीत भाजपने राष्ट्रवादीला चेकमेट दिला. दुसऱ्या टर्ममध्ये मात्र राष्ट्रवादीने याची परतफेड करीत पं.स.वर झेंडा रोवला.

............

चौकट

स्वबळाचे शड्डू

राज्यात महाविकास आघाडीचे सरकार असून, अगामी निवडणुका स्वबळावर लढविणार असल्याचे शड्डू अधून-मधून तीनही पक्षांकडून ठोकले जात असतात. त्यामुळे पंचायत समिती व जिल्हा परिषद निवडणुकीत पंचरंगी सामना रंगू शकतो. महाविकास आघाडी मिळून निवडणुका लढविल्या गेल्यास मविआ विरुद्ध भाजप अशीही रणधुमाळी होण्याची शक्यता वर्तवली जात आहे. खासदार उन्मेष पाटील, आमदार मंगेश चव्हाण व माजी आमदार राजीव देशमुख यांची प्रतिष्ठा यासाठी पणाला लागणार आहे.

..........

महत्त्वाची चौकट

चाळीसगावच्या ग्रामीण भागाची लोकसंख्या तीन लाख १७ हजार ३२८

जिल्हा परिषद व पंचायत समितींच्या २०२२ मध्ये होऊ घातलेल्या निवडणुका २०११च्या जनगणनेनुसार होतील. यासाठी तहसील प्रशासनाने ग्रामीण भागातील लोकसंख्येची माहिती जिल्हा प्रशासनाला पाठवली आहे.

एकूण लोकसंख्या (ग्रामीण)

- ३,१७,३२८

अनु.जाती - ३१,४४२

अनु. जमाती - ४२,३३२

...........

पक्षीय बलाबल

जि.प. एकूण सात गट

राष्ट्रवादी - ४

भाजप - ३

पंचायत समिती एकूण गण - १४

भाजप - ७

राष्ट्रवादी- ७

...........

इन्फो

जिल्हा परिषद गट व पंचायत समिती गणांच्या आगामी निवडणुकीसाठी ग्रामीण भागाची लोकसंख्या पाठविण्यासंबंधी गतआठवड्यात जिल्हास्तरावरून पत्र मिळाले आहे. त्यानुसार पत्रामध्ये लोकसंख्येविषयी माहिती पाठवली आहे.

- अमोल मोरे

तहसीलदार, चाळीसगाव