मोरया ग्लोबल कंपनीतील केमिकलला आग

जळगाव : एमआयडीसीतील डब्ल्यू सेक्टरमध्ये असलेल्या मोरया ग्लोबल या केमिकल बनविणाऱ्या कंपनीत रविवारी सकाळी दहा वाजता अचानकपणे केमिकलला आग लागली. अग्निशमन बंब वेळीच दाखल झाला. या कर्मचाऱ्यांनी केमिकल फोमचा मारा करून आग आटोक्यात आणली. त्यामुळे दुर्घटना टळली. आगीत किरकोळ नुकसान झाले आहे.

या कंपनीत नियमित काम सुरू असताना सकाळी ९ वाजून ५५ मिनिटांनी मशीनमध्ये असलेल्या केमिकलला अचानकपणे आग लागली. कंपनीचे मालक अरुण निंबाळकर यांनी अग्निशमन विभागाला घटना कळविली. अग्निशमन विभागाचे शशिकांत बारी, साहाय्यक अग्निशमन अधिकारी सुनील मोरे, चालक देवीदास सुरवाडे, हेड फायरमन रोहिदास चौधरी, साहाय्यक फायरमन भगवान पाटील, हिरामण बावस्कर, संजय भोईटे, सरदार पाटील, जगदीश साळुंखे या कर्मचाऱ्यांनी केमिकल फोमचा मारा करून आग आटोक्यात आणली. त्यामुळे अनर्थ टळला. एमआयडीसी पोलिसांनीही घटनास्थळी जाऊन माहिती घेतली. मात्र कंपनीचे मालक अरुण निंबाळकर यांनी किरकोळ नुकसान झाले असून कुठलीही तक्रार नसल्याचे पोलिसांना सांगितले.