प्रेमविवाह केलेल्या तरुणीपाठोपाठ तरुणाचाही मृत्यू

लोकमत न्यूज नेटवर्क

जळगाव : प्रेमविवाहानंतर संशयास्पद मृत्यू झालेल्या तरुणीसोबतच तिचा प्रियकर तथा पती प्रशांत विजयसिंग पाटील (रा.पाळधी, ता.धरणगाव) याचाही शनिवारी सकाळी उपचारादरम्यान जळगावात मृत्यू झाला. दरम्यान, या घटनेमुळे दोघं कुटुंबीयांनी एकमेकांवर आरोप केलेले आहेेत. प्रियकराचे वडील विजयसिंग बाबुराव पाटील, त्याचा मित्र विकास धर्मा कोळी व विक्की उर्फ विजय संतोष बोरसे (रा.पाळधी, ता.धरणगाव) या तिघांना शनिवारी अटक करण्यात आली आहे.

सूत्रांनी दिलेल्या माहितीनुसार, प्रशांत विजयसिंग पाटील व आरती विजय भोसले या दोघांनी प्रेमप्रकरणातून पलायन केले होते व नंतर प्रेमविवाह करून परत आल्यावर दोनच दिवसांत आरतीचा मृत्यू झाला. प्रशांत याच्या घरात ३१ डिसेंबर रोजी ही घटना घडली. प्रशांत याने या दिवशी मित्रांसोबत घरात पार्टी केली होती. त्यानंतर एका खोलीत आरती, तर प्रशांत दुसऱ्या खोलीत बेशुद्धावस्थेत आढळून आले होते. रुग्णालयात दाखल केल्यावर आरतीला डॉक्टरांनी मृत घोषित केले होते. आरतीच्या बाबतीत घातपात इतर प्रकार झाल्याचा संशय तिच्या आई, वडिलांनी व्यक्त करून तिच्या सासरचे व मित्रांना अटक होत नाही तोपर्यंत मृतदेह ताब्यात न घेण्याचा पवित्रा घेतला होता. त्यामुळे पोलिसांनी शुक्रवारी आरतीचे वडील विजय हरसिंग भोसले यांच्या फिर्यादीवरून पती प्रशांत विजयसिंग पाटील, सासरे विजयसिंग बाबूराव पाटील, मित्र विकास धर्मा कोळी, विक्की उर्फ विजय संतोष कोळी व नणंद कविता सुनील पाटील यांच्याविरुद्ध गुन्हा दाखल केला. शनिवारी सकाळी वरील तिघांना अटक झाली. त्यानंतर प्रशांतच्याही मृत्यूची बातमी धडकली.

व्हिसेरा ठेवला राखीव

आरती व प्रशांत या दोघांचा मृत्यू विषारी द्रव्यामुळे झाल्याचा प्राथमिक अहवाल पोलिसांना मिळाला असून, नेमके कारण स्पष्ट होण्यासाठी दोघांचाही व्हिसेरा राखीव ठेवण्यात आल्याची माहिती सहायक पोलीस निरीक्षक हनुमंत गायकवाड यांनी दिली. दरम्यान, मृतदेह अर्धनग्न अवस्थेत आढळून आल्याने तिच्यावर अत्याचार झाल्याचा संशय व्यक्त होत होता, मात्र तसा काहीच प्रकार नसल्याचेही शवविच्छेदन अहवालातून स्पष्ट झालेले आहे. प्रशांतच्या कुटुंबाविरुद्ध गुन्हा दाखल होऊन अटकेची कारवाई झाली आहे, त्यामुळे आता आमचाही मुलगा मृत झाला असून, आरतीच्या कुटुंबीयाविरुध्द गुन्हा दाखल होऊन अटकेची कारवाई करावी, तोपर्यंत मृतदेह ताब्यात घेणार नसल्याचा पवित्रा प्रशांतच्या बहिणीने व इतर कुटुंबीयांनी घेतला होता. पाेलिसांनी मध्यस्थाची भूमिका बजावल्यानंतर प्रशांतवर अंत्यसंस्कार करण्यात आले.