अमळनेर येथे सफाई कर्मचाऱ्यांना साहित्य वाटप

<p>


अमळनेर, जि.जळगाव : विप्रो कंपनीचे सर्वेसर्वा संस्थापक अजिम प्रेमजी यांच्या वाढदिवसानिमित्त सुनील चौधरी व मित्र परिवाराने सफाई कामगारांना बुट, हात मौजे व मास्क मोफत वाटप केले.
गटारीत उतरुन व हात घालुन साफसफाई करत असतात, अशा सफाई कामगार बांधवाचे आरोग्य चांगले राहावे. जे रोज इतरांचे आरोग्य चांगले रहावे म्हणून आपले आरोग्य धोक्यात घालून अनवानी व हातात काहीही न घालता गटार साफ करतात, अशा बांधवाना होणारा त्रास बघून सुनील चौधरी यांनी अजीमजींच्या वाढदिवसानिमित्त या कामगार बांधवांसाठी फायबरचे शुज, ग्लोज, मास्क व कॅप २०० सफाई कामगार बांधवाना वाटप केले.
यावेळी डीवायएसपी रफिक शेख अध्यक्षस्थानी होते, तर प्रमुख पाहुणे म्हणून राजाराम चौधरी, लायन्स क्लबचे अध्यक्ष प्रशांत सिंघवी, जितेंद्र जैन, योगेश मुंदडा, लायनेस नयना नवसारीकर, प्रदीप अग्रवाल हे उपस्थित होते.
आपल्या अध्यक्षीय भाषणात रफीक शेख म्हणाले की, खरोखर आपले सफाई कामगार बांधव हे कसली ही पर्वा न करता साफसफाई करत असतात. त्याची दखल घेणे हे आपले कर्तव्य आहे व हे काम सुनील चौधरी यांनी केले. त्यामुळे मी त्यांचे प्रथम अभिनंदन करतो. अशा पध्दतीने छान उपक्रम राबवुन आपण विविध क्षेत्रात सामाजिक काम करुन आपल्या गावाची व आपल्या लोकांची सेवा करु शकतो.
याप्रसंगी मंजिरी कुलकर्णी, सुनील माहेश्वरी, देशमुख, युसुफ पटेल, प्रदीप जैन, पंकज मुंदडा, शाभ गोकलाणी, मनीष जोशी, मिलिंद नवसारीकर, शेखर धनगर, जास्मिन भरुचा, भरुचा व बहुसंख्य मित्र परिवार व सफाई कामगार व न.पा. कर्मचारी बांधव उपस्थित होते. सूत्रसंचालन डिंगबर महाले यांनी तर आभार सुनील चौधरी यांनी मानले.