आयटीआयची २९ पासून जिल्हास्तरीय समुपदेशन फेरी

जळगाव - औद्योगिक प्रशिक्षण संस्थांची प्रवेश प्रक्रिया ५ डिसेंबरपासून सुरु झालेली आहे. या प्रवेश प्रक्रीयेच्या २३ डिसेंबरपर्यंत एकूण चार फेऱ्या पूर्ण झाल्या आहेत. पुढील जिल्हास्तरीय समुपदेशन फेरी २९ व ३० डिसेंबर रोजी होणार आहे.
सर्व शासकीय व खाजगी औद्योगिक प्रशिक्षण संस्थानिहाय रिक्त जागांसाठी प्रवेशइच्छूक उमेदवारांना व्यवसायनिहाय रिक्त जागांचा अभ्यास करुन जिल्हास्तरीय समुपदेशन फेरीसाठी आपल्या प्रवेश खात्यात प्रवेश लॉगीन करुन कोणत्याही एका जिल्ह्याच्या समुपदेशन फेरीकरीता २५ व २६ डिसेंबरपर्यंत सकाळी ८ ते ५ वाजेपर्यंत नोंदणी करता येणार आहे. २७ डिसेंबर रोजी सायंकाळी ५ वाजेपर्यंत उमेदवारांची जिल्हास्तरीय समुपदेशन फेरीसाठी संगणक प्रणालीव्दारे गुणवत्ता यादी प्रकाशीत केली जाईल व तशी माहिती एसएमएस प्रणालीद्वारे देण्यात येणार आहे.

गुणवत्ता क्रमांकानुसार बोलविण्यात येणार
दरम्यान, दिलेल्या वेळेत व दिनांकास हजर असलेल्या उमेदवारांना त्यांच्या गुणवत्ता क्रमांकानुसार समुदपदेशन फेरीकरीता बोलविण्यात येणार आहे. प्रवेशाकरीता उपलब्ध जागा, उमेदवारांची मागणी, उमेदवारांची आर्हता या आधारावर २९ व ३० डिसेंबर रोजी सकाळी ८ ते ५ वाजेपर्यंत प्रत्यक्ष प्रवेश प्रक्रीयेच्यावेळी जागांचे वाटप केले जाईल. या प्रवेश फेरीत जागा बहाल करण्यात आलेल्या उमेदवारांना सर्व मूळ प्रमाणपत्रांच्या पडताळणीनंतर संबधीत औद्योगिक प्रशिक्षण संस्थेत दिलेल्या मुदतीत प्रवेशाची कार्यवाही करण्यात येईल.