ग्रामपंचायत निवडणुकीमुळे १५ जानेवारीची परीक्षा पुढे ढकलली

जळगाव : ग्रामपंचायत निवडणुकीसाठी १५ जानेवारीला मतदान असल्यामुळे कवयित्री बहिणाबाई चौधरी उत्तर महाराष्ट्र विद्यापीठाच्या सर्व अभ्यासक्रमांच्या शुक्रवारी (दि.१५) आयोजित ऑनलाइन परीक्षा पुढे ढकलण्यात आली आहे.

विद्यापीठाच्या शैक्षणिक वर्ष २०२०-२०२१ मधील कला, विज्ञान व वाणिज्य पदवी, व्यवस्थापनशास्त्र अभ्यासक्रमांतर्गत सत्र २, ४ व ६ या सत्रांतील बॅकलॉग विद्यार्थ्यांच्या परीक्षा ऑनलाइन एमसीक्यू स्वरूपात दि. ५ जानेवारीपासून सुरू आहेत. ग्रामपंचायत सार्वत्रिक निवडणूक-२०२० जाहीर झाली असून शुक्रवार, दि. १५ रोजी मतदान होणार आहे. परीक्षार्थी विद्यार्थी व संबंधित घटक मतदानापासून वंचित राहू नये म्हणून दि.१५ जानेवारी रोजी विद्यापीठामार्फत आयोजित सर्व अभ्यासक्रमांची परीक्षा पुढे ढकलण्यात आली असून, सदर दिवसाच्या अभ्यासक्रमनिहाय परीक्षांच्या तारखा लवकरच कळविण्यात येणार असल्याचे परीक्षा व मूल्यमापन मंडळाचे संचालक बी. पी. पाटील यांनी कळविले आहे.