यंदाच्या पावसाळ्यात जळगाव जिल्ह्यात ४१ घरे पडली

आतापर्यंत पुराच्या पाण्यात ८ जण वाहून गेले

जळगाव : यंदा पावसाने जोरदार हजेरी लावत सरासरीची शंभरी ओलांडली आहे. मात्र संततधार व जोरदार पावसामुळे जिल्ह्यात आतापर्यंत ४१ पक्क्या व कच्च्या घरांची पूर्णत: पडझड झाली आहे. तर ३१९७ कच्च्या व पक्क्या घरांची पडझड होऊन नुकसान झाले आहे. तर पुराच्या पाण्यात वाहून ८ जणांचा मृत्यू झाला आहे.
यंदा पावसाने जिल्ह्यात जोरदार हजेरी लावली. त्यामुळे नदी-नाल्यांना पूर आले. या पुरामुळे तसेच संततधार पावसामुळे जून ते सप्टेंबर या चार महिन्यांच्या कालावधीत ४१ घरांची पूर्णपणे पडझड झाली आहे. १४८२ पक्क्या घरांची तर १६९७ कच्च्या घरांची अंशत: पडझड झाली आहे.
पुन्हा अतिवृष्टीचा इशारा... जिल्ह्यात यंदा पावसाने सरासरीची शंभरी पार केली आहे. त्यामुळे नदी-नाले ओसंडून वाहत आहेत. अशी परिस्थिती असताना जिल्ह्यात पुन्हा अतिवृष्टीचा इशारा हवामान खात्याने दिला आहे. लहान-मोठे पूल, रस्ते पुराच्या पाण्यामुळे बाधीत झाले आहेत. तसेच रस्त्याच्या कडेची झाडे, विद्युत खांब व तारा धोकादायक अवस्थेत आहेत. नागरिकांनी दक्षता घेण्याचे आवाहन जिल्हा प्रशासनाने केले आहे.