निवडणुकांचा जळगावातील धान्याच्या आवकवर परिणाम

बाजारगप्पा : राजस्थान, मध्यप्रदेशातील निवडणुकांमुळे जळगावच्या बाजारपेठेत धान्याची आवक थांबल्याने बाजारपेठेत धान्याची कमतरता जाणवू लागली.

- विजयकुमार सैतवाल (जळगाव)

राजस्थान, मध्यप्रदेशातील निवडणुकांमुळे जळगावच्या बाजारपेठेत धान्याची आवक थांबल्याने बाजारपेठेत धान्याची कमतरता जाणवू लागली. मात्र मागणी नसल्याने भाव स्थिर आहेत. जळगावच्या बाजारपेठेत गहू, कडधान्य, बाजरीची आवक राजस्थान, मध्यप्रदेशातून होत असते. मात्र तेथे विधानसभेच्या निवडणुका असल्याने गेल्या आठवड्यापासून धान्याची आवक कमी झाली होती. सध्या खरेदीचाही हंगाम नसल्याने बाजारपेठेत धान्याला मागणी नव्हती. त्यामुळे आवक नसली तरी भाव स्थिर राहिले. बाजारपेठेत नवीन तांदळाची आवक सुरू झाली असून, जुन्या तांदळापेक्षा नवीन तांदळाचे भाव कमी असल्याने ग्राहकांना दिलासा मिळत आहे. 

रबी हंगामात लागवड होणाऱ्या रबी ज्वारीच्या भावात वाढ सुरू असून, या आठवड्यात थेट  २०० प्रतिक्विंटलने ज्वारीच्या भावात वाढ होऊन ती ३००० ते ३२०० रुपये प्रतिक्विंटलवरून ३२०० ते ३४०० प्रतिक्विंटलवर पोहोचली आहे. गेल्या आठवड्यात डाळींचे कमी झालेले भाव या आठवड्यात स्थिर राहिले, अशी माहिती जळगाव दाणा बाजार असोसिएशनचे अध्यक्ष प्रवीण पगारिया यांनी दिली.  

दोन आठवड्यांपूर्वी ७५०० ते ८००० रुपये प्रतिक्विंटल असलेल्या मुगाच्या डाळीत गेल्या आठवड्यात घट होऊन ती ७००० ते ७४०० रुपयांवर आली होती. या आठवड्यातही ती याच भावावर स्थिर आहे. उडदाच्या डाळीचे भाव ६००० ते ६३००  रुपये प्रतिक्विंटल, हरभरा डाळीचे भाव या आठवड्यात ६००० ते ६४००  रुपये प्रतिक्विंटलवर स्थिर आहेत. दोन आठवड्यांपूर्वी तुरीच्या डाळीच्या भावात वाढ झाली होती. मात्र गेल्या आठवड्यात तूर डाळ ७००० ते ७४००  रुपये प्रतिक्विंटलवर आली.

या आठवड्यातही ती याच भावावर स्थिर आहे. चांगल्या दर्जाच्या मुगाचे भाव  ६६७५ रुपये प्रतिक्विंटलवर पोहोचले आहेत. तसेच चांगल्या दर्जाच्या उडदाचे भावदेखील ५६०० रुपये प्रती क्विंटलवर पोहोचले आहेत. नवीन तांदळाचा हंगाम सुरू झाला असून, छत्तीसगड, मध्यप्रदेशसह गोंदिया, तुमसर या भागातून नवीन तांदूळ येऊ लागला आहे. नवीन चिनोर तांदळाचे भाव ३००० रुपये प्रतिक्विंटल असून, जुन्या चिनोर तांदळाचे भाव ३४०० रुपये प्रतिक्विंटल आहेत.

गव्हाला मागणी वाढल्याने १०० रुपये प्रतिक्विंटलने गव्हाच्या भावात वाढ झाली होती. मात्र या आठवड्यात गव्हाचे भाव स्थिर असल्याने ग्राहकांना दिलासा मिळाला आहे. १४७ गहू  २६५० ते २७५० रुपये प्रतिक्विंटलवर स्थिर आहे. तसेच लोकवन गहू  २५५० ते २६०० रुपये, शरबती गहू  २७५० ते २८५० रुपये प्रतिक्विंटल, चंदोसी ३८५० ते ४००० रुपये प्रतिक्विंटलवर स्थिर आहे. मध्यप्रदेश व राजस्थानातून गव्हाची आवक लवकरच पुन्हा सुरू होईल, अशी माहिती व्यापाऱ्यांनी दिली. ज्वारी, बाजरीचे भावदेखील या आठवड्यात स्थिर आहेत. ज्वारीचे भाव २००० ते २१०० रुपये प्रतिक्विंटल, बाजरी २२०० ते २३०० रुपये प्रतिक्विंटलवर स्थिर आहे.