गिरीश कुबेरांनी माफी मागण्याची मागणी

भाजीपाला, फळे व शेती संबंधित दुकाने सुरू ठेवण्याची मागणी

जळगाव : भाजीपाला, फळे व शेती संबंधित दुकाने कोरोनाच्या पार्श्वभूमीवर योग्य त्या सूचना देऊन सुरू ठेवण्याची मागणी बहुजन मुक्ती पार्टीतर्फे करण्यात आली आहे. तसेच शेतकऱ्यांना जुन्या दरानेच खते विक्री करण्याचीही मागणी करण्यात आली आहे. अन्यथा २९ मे पासून आंदोलन करण्याचा इशारा महानगर अध्यक्ष इरफान शेख यांनी दिला आहे.

पावसानंतर शुक्रवारी वातावरणात पुन्हा उकाडा

जळगाव : गुरुवारी जिल्हाभरात अनेक ठिकाणी झालेल्या अवकाळी पावसामुळे वातावरणात गारवा निर्माण झाला होता. मात्र, शुक्रवारी दुपारनंतर पुन्हा तापमानाचा पारा वाढल्याने वातावरणात उकाडा जाणवत होता. तसेच त्या काही वेळा अधून-मधून वीज पुरवठा खंडित होत असल्याने नागरिकांना चांगलाच उकाड्याचा त्रास सहन करावा लागला. तरी महावितरण प्रशासनाने विजेची समस्या सोडविण्याची मागणी नागरिकांमधून केली जात आहे.

ढापा दुरुस्त करण्याची मागणी

जळगाव : व. वा. वाचनालयाच्या इमारती जवळ गटारीवरील ढापा तुटल्याने वाहन धारकांना व पायी जाणाऱ्या नागरिकांना अडचणीचा सामना करावा लागत आहे. रात्री वेळेला या ठिकाणी पाय घसरून पडण्याची शक्यता निर्माण झाली आहे. तरी मनपा प्रशासनाने हा ढापा दुरुस्त करण्याची मागणी नागरिकांमधून केली जात आहे.

किसान रेल्वे दररोज सुरू ठेवण्याची मागणी

जळगाव : शेतकरी बांधवांसाठी सुरू केलेली किसान रेल्वे आठवड्यातून फक्त तीनच दिवस धावत आहे. यामुळे शेतकरी बांधवांना परराज्यात मालाची वाहतूक करण्यास विलंब होत आहे. दररोज ही गाडी सुरू राहिल्यास शेतकरी बांधवांना दररोज माल पाठवता येणे शक्य होणार आहे. त्यामुळे किसान रेल्वे दररोज सुरू ठेवण्याची मागणी शेतकरी बांधवांमधून केली जात आहे.