आजी,माजी लोकप्रतिनिधींवरही अटकेची टांगती तलवार

लोकमत न्यूज नेटवर्क

जळगाव : ठेवीदारांच्या पावत्या कमी किमतीत विकत घेऊन त्या कर्जात समायोजित केल्याच्या प्रकरणात सराफ तथा हॉटेल व्यावसायिक भागवत गणपत भंगाळे, दालमील असोसिएशनचे प्रेम रामनारायण कोगटा, जयश्री शैलेश मणियार यांच्यासह ११ जणांना पुणे आर्थिक गुन्हे शाखेच्या पथकाने अटक केल्यानंतर आता दुसऱ्या टप्प्यात आजी, माजी लोकप्रतिनिधी यांच्यावर अटकेची टांगती तलवार असल्याची माहिती विश्वसनीय सूत्रांनी दिली.

जिल्ह्यातील या बड्या लोकांनी बीएचआरमधून नियम डावलून कोटीच्या घरात कर्ज घेतले आहे. सीआयडीच्या फॉरेन्सीक फ्रॉड डीटेक्शन ऑडीट रिपोर्टमध्ये तसा स्पष्ट उल्लेख आलेला आहे. येत्या काही दिवसांत त्यांनाही गुन्ह्यात आरोपी केले जाणार असल्याचे सांगितले जात आहे.

अटकेतील या सर्व जणांना २२ जूनपर्यंत पोलीस कोठडी सुनावण्यात आलेली आहे. अटकेतील संशयितांनी एजंटच्या माध्यमातून पतसंस्था बुडाल्याचे वातावरण तयार करुन ठेवीदारांच्या २० ते ३० टक्क्यात पावत्या खरेदी करुन पूर्ण रक्कम मिळाल्याचे प्रतिज्ञापत्र लिहून घेतले आहे. या साखळीत एजंट, कर्जदार, प्रशासक यांच्यासह आणखी काही इतरांचा समावेश असल्याचे उघड झालेले आहे. दरम्यान, या गुन्ह्यात आतापर्यंत अटक केलेल्यांचा आकडा सतरावर पोहचला आहे.

प्रमोद कापसेची चौकशी सुरुच

दरम्यान, पुणे आर्थिक गुन्हे शाखेने गुरुवारी पुन्हा जळगाव शहर, जामनेर, पाळधी ,भुसावळ, औरंगाबाद, मुंबई, अकोला व पुणे येथे एकाच वेळी धाडसत्र राबविले. यात १२ जणांना ताब्यात घेतले. एकूण ११ जणांना पोलिसांनी न्यायालयात हजर केले. १२ वी व्यक्ती प्रमोद किसनराव कापसे (रा.अकोला) यांना अद्याप अटक झालेली नाही. त्यांची अजूनही चौकशी सुरु आहे. यात त्यांनी काही कागदपत्रे पोलिसांकडे सादर केली आहेत. त्यात त्याचे दूरचे नातेवाईक गुंतलेले आहेत, त्यामुळे कापसे भूमिका अजून स्पष्ट झालेली नसल्याने त्याला अजून अटक केली नसल्याची माहिती आर्थिक गुन्हे शाखेच्या उपायुक्त भाग्यश्री नवटके यांनी ‘लोकमत’ला दिली. दरम्यान, बीएचआरशी संबंधित अकोल्यात देखील काही वर्षापूर्वी २६ जणांवर गुन्हा दाखल असल्याची माहिती मिळाली.

एजंटही आले रडारवर

तपासात बड्या कर्जदारांसोबतच ठेव पावत्या कमी किमतीच खरेदी करुन त्या बड्या कर्जदारांना देऊन त्यांचे कर्ज नील दाखविण्यात एजंट लोकांनी महत्वाची भूमिका बजावली आहे. सेटलमेंट करणारे एजंट देखील रडारवर आलेली आहेत. तपासात अनेक एजंटांची नावे समोर आलेली असून पोलिसांनी ही नावे न्यायालयातही सांगितलेली आहेत. त्यामुळे बडे कर्जदार असलेले लोकप्रतिनिधी यांच्यासोबतच या एजंटवर अटकेची टांगती तलवार आहे.

कोट....

प्रमोद कापसे याची चौकशी सुरु आहे. त्याने काही कागदपत्रे सादर केलेली आहेत. त्यामुळे त्यांची भूमिका नेमकी काय आहे, हे अजून स्पष्ट झालेले नाही. अटकेतील ११ जणांची चौकशी सुरु आहे.

-भाग्यश्री नवटके, पोलीस उपायुक्त, आर्थिक गुन्हे शाखा, पुणे