दुचाकीची ट्रकला धडक; दुचाकीस्वार ठार

जळगाव : रस्त्याकडेला उभ्‍या असलेल्या ट्रॉलीला भरधाव दुचाकीस्वाराने धडक दिली. यात दुचाकीस्वार प्रल्हाद तोताराम सोनवणे (रा. विटनेर) हे जागीच ठार झाले असून, ही घटना गुरूवारी रात्री ८ वाजता रामदेववाडी गावाजवळ घडली. याप्रकरणी मयत दुचाकीस्वाराविरूद्ध एमआयडीसी पोलीस ठाण्यात गुन्हा दाखल करण्‍यात आला आहे.

वडली येथील अतुल पाटील यांच्या ट्रॅक्टरचे ड‍िझेल रामदेववाडी गावाजवळ संपले. त्यामुळे त्यांनी ट्रॅक्टर रस्त्याकडेला उभा केला होते. रात्री ८ वाजण्याच्या सुमारास प्रल्हाद सोनवणे हे दुचाकीने जळगावकडून पाचोराकडे जात होते. त्यांच्या दुचाकीवर हर्षल सुरळकर हे मागे बसले होते. यावेळी दुचाकी भरधाव वेगाने चालवून सोनवणे यांनी रस्त्याकडेला उभ्‍या असलेल्या ट्रॅक्टरच्या ट्रॉलीला मागून जोरदार धडक दिली. यात प्रल्हाद सोनवणे यांचा मृत्यू झाला तर सुरळकर हे गंभीर जखमी झाले. याप्रकरणी शुक्रवारी अतुल पाटील यांच्या फिर्यादीवरून स्वत:च्या मरणास व सुरळकर यांच्या दुखापतीला कारणीभूत म्हणून प्रल्हाद सोनवणे यांच्याविरूध्‍द गुन्हा दाखल करण्‍यात आला आहे.