डिसेंबर महिन्यात घरांची खरेदी विक्री जोरात

लोकमत न्यूज नेटवर्क

जळगाव : कोरोनानंतरच्या काळात खरेदी विक्रीच्या व्यवहारांना आता वेग मिळत असला तरी डिसेंबर महिन्यात चलन जमा केल्यावर पुढील चार महिने मालमत्तेच्या खरेदी विक्री व्यवहारात तीन टक्के सुट मिळणार आहे. त्यामुळे डिसेंबर महिन्यात चलन जमा करून दस्त नोंदणी करणाऱ्यांची संख्या मोठ्या प्रमाणात वाढली होती. या एकाच महिन्यात १३ हजार ७८४ दस्त नोंदणी करण्यात आली आहे. त्यामुळे शासनाला तब्बल २० कोटी रुपयांचे मुद्रांक शुल्क देखील मिळाले.

या चालु आर्थिक वर्षात कोरोनामुळे सुरूवातीच्या महिन्यात मोठा फटका बसला होता. लॉकडाऊनमुळे व्यवहार बंदच होते. मात्र त्यानंतर हळुहळु व्यवहार सुरू झाले. मे महिन्यात काही प्रमाणात व्यवहार होत होते. मात्र शासनाने डिसेंबर महिन्यात व्यवहार करणाऱ्यांना तीन टक्के सुट देण्यात आली आहे. असे असले तरी जानेवारीपासून एक टक्के मुद्रांक शुल्कात वाढ होत आहे. त्याचा परिणाम देखील दिसून आला आहे. त्यात ज्यांनी डिसेंबरपर्यंत मुद्रांक शुल्क भरून चलन घेतले आहे. त्यांना मार्च महिन्यापर्यंत आपले खरेदी विक्रीचे व्यवहार पुर्ण करता येणार आहे.

अधिकाऱ्याचा कोट

शासनाने डिसेंबर अखेरीस मुद्रांक शुल्काची रक्कम जमा करणाऱ्यांना तीन टक्के सुट दिली होती. त्याचा फायदा मालमत्ता खरेदी करणाऱ्यांना होत आहे. यामुळे देखील डिसेंबर महिन्यात दस्त नोंदणी जास्त झाली आहे. - सुनिल पाटील, सहदुय्यम निबंधक, मुद्रांक, जळगाव

डिसेंबर महिन्यात २० कोटींचा महसुल

जिल्हाभरात सप्टेंबर महिन्यात १३.२४ कोटी ऑक्टोबरमध्ये १४.८० कोटी, नोव्हेंबरमध्ये १५.२० कोटी आणि डिसेंबर महिन्यात २० कोटी रुपयांचा महसुल शासनाला मिळाला आहे. त्यात निबंधक कार्यालय क्रमांक एकमध्ये ५७५, जळगाव २ मध्ये १३०५, जळगाव तीनमध्ये ७५४, जामनेर ७२४, पाचोरा ९३८, चाळीसगाव ५८५, भुसावळ ८७७, अमळनेर ९६९, चोपडा ८४६, बोदवड ५४६, पहुल ४४७, धरणगाव ६१७, भडगाव ५७४, पारोळा ७८६, चाळीसगाव कार्यालय दोन ८३०, एरंडोल ७००, सावदा ६१२, यावल ३२७, रावेर ४२९, मुक्ताईनगर ३४३ अशी दस्त नोंदणी झाली आहे.

आकडेवारी

डिसेंबर महिन्यात झालेले खरेदीविक्रीचे व्यवहार १३,७८४

महिन्यानुसार झालेले खरेदीविक्रीचे व्यवहार

एप्रिल : ०

मे २३५१

जून ५४८५

जुलै ६०३७

ऑगस्ट ५९१३

सप्टेंबर ६९४७

ऑक्टोबर ६८४४

नोव्हेंबर ८००४

डिसेंबर १३७८४