दोन महिन्यात राज्यात अपंग धोरणाची अंमलबजावणी : राजकुमार बडोले

जळगावातील दिव्यांग निवासी प्रशिक्षण केंद्राचा पॅटर्न राज्यभरात राबविण्याचे आश्वासन. दिव्यांग स्वावलंबन योजनेची जळगावातून सुरुवात करणार

 जळगाव,दि.30- अपंग धोरणातील 18 मुद्यांसंदर्भात इंटरनेटच्या माध्यमातून अभिप्राय मागविण्यात आले असून येत्या दोन महिन्यात हे धोरण राज्यात लागू केली जाईल, अशी महत्त्वपूर्ण घोषणा राज्याचे सामाजिक न्याय व विशेष सहाय्य मंत्री राजकुमार बडोले यांनी जळगावात केली. जळगाव दौ:यावर आले असताना त्यांनी पत्रकारांशी संवाद साधला, त्या वेळी ते बोलत होते. 

या वेळी त्यांनी सामाजिक न्याय व विशेष सहाय्य विभागाच्यावतीने राबविण्यात आलेल्या विविध योजनांची माहिती दिली. 

जळगावातील पॅटर्न राज्यभर राबविणार

जळगावातील दीपस्तंभ फाउंडेशनच्या वतीने दिव्यांग मुला-मुलींना स्पर्धा परीक्षेची तयारी करता यावी यासाठी सुरू केलेल्या दिव्यांग निवासी प्रशिक्षण केंद्राचा पॅटर्न राज्यभरात राबविणार असल्याची घोषणा त्यांनी केली. 

दिव्यासांठी 300 मुला-मुलींची क्षमता असलेले वसतीगृह तयार करण्याचा मानस असून यासाठी राबविण्यात येणा:या दिव्यांग स्वावलंबन योजनेची सुरुवात जळगावातून करण्यात येईल, अशीही माहिती बडोले यांनी दिली. 

दिव्यांगासाठी स्वतंत्र विद्यापीठ

दिव्यांग मुला-मुलींना शिक्षण तर मिळत आहे, मात्र त्यात त्यांना अनेक अडचणी येतात.  हे टाळण्यासाठी अशा मुला-मुलींसाठी स्वतंत्र विद्यापीठ सुरू करण्याचाही मानस असल्याचे बडोले म्हणाले.