'तो' प्रवास अखेरचा ठरला! घसरलेली दुचाकी दगडावर आपटून तरुणाचा मृत्यू; कुटुंबावर शोककळा

डोक्याला, छातीला गंभीर दुखापत झाल्यानं तरुणाचा दुर्दैवी अंत

जळगाव : धावती दुचाकी घसरुन ती दगडावर आदळल्याने गुलाब नवल बाविस्कर (३८,या. इंदिरानगर कुसुंबा, ता. जळगाव) हा तरुण जागीच ठार झाल्याची घटना गुरुवारी रात्री अकरा वाजता गोदावरी अभियांत्रिकी महाविद्यालयाजवळ घडली.

पोलिसांनी दिलेल्या माहितीनुसार, गुलाब बाविस्कर हे एमआयडीसीतून महामार्गाकडे दुचाकीने जात असताना गोदावरी अभियांत्रिकी जवळ दुचाकी घसरली. त्यात काही अंतरावर दगडावर जाऊन दुचाकी आदळली. त्यामुळे गुलाब यांच्या डोक्याला, छातीला मार लागला. नाकातोंडातून रक्त आले होते. घटनेची माहिती मिळताच एमआयडीसी पोलिस ठाण्याचे सहाय्यक फौजदार आनंदसिंग पाटील, विकास सातदिवे व गणेश शिरसाळे यांनी घटनास्थळी धाव घेतली. गुलाब यांना रुग्णवाहिकेतून शासकीय रुग्णालयात हलविले असता तेथे डॉक्टरांनी मृत घोषित केले. खिशातील आधारकार्ड व मोबाईलवरून मृतांची ओळख पटली. पोलिसांनी मृताच्या वडिलांशी संपर्क साधून घटनेची माहिती दिली. गुलाब पाईपच्या कंपनीत कामाला आहे. त्यांच्या पश्चात पत्नी आई वडील व दोन मुले असा परिवार आहे.