जळगावात आवक घटल्याने बाजरी तेजीत

बाजारगप्पा :कमी पावसामुळे जळगावात शेतीमालाची आवक घटून त्यांचे भाव वाढण्यास सुरुवात झाली आहे.

- विजयकुमार सैतवाल (जळगाव)

कमी पावसामुळे जळगावात शेतीमालाची आवक घटून त्यांचे भाव वाढण्यास सुरुवात झाली आहे. यामध्ये ऐन उडीद, मुगाची आवक असणाऱ्या काळातच उडीद, मूग तसेच डाळींमध्ये व ज्वारी, बाजरी, दादरच्या भावात मोठी वाढ झाली. डाळींमध्ये तर ८०० ते ९०० रुपये प्रति क्विंटलने वाढ झाली आहे. 

गहू व तांदळाचे भाव स्थिर असल्याने तेवढा ग्राहकांना दिलासा आहे. सप्टेंबरपासून बाजारात नवीन उडीद, मुगाची आवक सुरू होते. त्यानुसार यंदाही ही आवक सुरू झाली. मात्र, मुगाला शेवटच्या टप्प्यात आवश्यकता असतानाच पावसाने दडी मारल्याने उडीद, मुगाच्या उत्पादनासह दर्जावर परिणाम झाला आहे. उडीद, मुगाची आवक कमी असल्याने या डाळीत तेजी सुरू झाल्याची माहिती जळगाव दाणाबाजार असोसिएशनचे अध्यक्ष प्रवीण पगारिया यांनी दिली.

गेल्या आठवड्यात ६,२०० ते ६,६०० रुपये प्रति क्विंटल मुगाची डाळ या आठवड्यात ७,००० ते ७,५०० रुपये प्रति क्विंटल झाली. उडदाची डाळही ४,७०० ते ४,८०० रुपयांवरून ५,२०० रुपये प्रति क्विंटल झाली. हरभरा डाळ, तूर डाळदेखील स्थिर आहे. नवीन उडीद-मुगामध्ये काही माल बारीक, काही माल डागी असल्याने मुगाला ३,२०० ते ४,००० रुपये, तर उडदाला २,८०० ते ३,००० रुपये, मुगाचे भाव ५,००० रुपयांवरून ५,५०० ते ५,८०० रुपये प्रति क्विंटलवर पोहोचले. चांगल्या दर्जाच्या उडदाचे भाव ३,५०० ते ४,००० रुपयांवरून ४,५०० ते ४,८०० रुपये प्रति क्विंटलवर पोहोचले.

गव्हाचे भाव स्थिर आहेत. १४७ गहू २,४०० ते २,५०० रुपयांवरून २,४५० ते २,५५० रुपये प्रति क्विंटल, लोकवन गव्हाच भाव २३५० ते २४५० रुपये, शरबती गहू २,५५० ते २,६५० रुपये आणि चंदोसीचे भाव ३,६५० ते ३,८५० रुपयांवर पोहोचले आहेत. बाजारपेठेत जळगाव जिल्ह्यासह मध्यप्रदेश व राजस्थानातून गव्हाची आवक सुरू आहे.