‘रुपया’ वाढवितोय सुवर्णनगरीची चिंता

रुपयात घसरण तरी चांदीचे भाव गडगडताहेत

विजयकुमार सैतवाल
जळगाव : अमेरिकन डॉलरच्या तुलनेत रुपयांची घसरण सुरूच असल्याने व इंधनाचे दर वाढण्यासह सोन्याच्या भावावरही परिणाम होत असल्याने ‘रुपया’ सुवर्णनगरी जळगावातील मोठा व्यवसाय असलेल्या सराफ व्यवसायात चिंता वाढवित आहे. २२ दिवसात सोन्याच्या भावात तब्बल १२०० रुपयांनी वाढ झाली व सोने पुन्हा ३१ हजारावर गेले. भावातील या सततच्या चढ-उतारामुळे सुवर्ण व्यवसायात अस्थिरता निर्माण होत आहे.
रुपयांचे अवमूल्यन, जागतिक पातळीवर विविध देशांमधील वाद, नैसर्गिक आपत्ती, इंधनाचे दर या सर्व घटकांचा सोन्याच्या भावावर मोठा परिणाम होत असतो. त्यात आता तर रुपयाचे सलग दोन महिन्यांपासून मोठ्या प्रमाणात अवमूल्यन सुरू आहे. यामुळे इंधनाचे दर कधी नव्हे एवढ्या उच्चांकीवर पोहचले असून त्याचा सर्वांनाच फटका बसत आहे. सोबतच अमेरिकन डॉलरच्या तुलनेत भारतीय रुपयाचे अवमूल्यन झाल्यास सोन्याच्या दरात वाढ होते. यास जुलै व आॅगस्ट महिना अपवाद ठरला. त्या वेळी अमेरिकेतच सोन्याला मागणी कमी झाल्याने रुपयाचे अवमूल्यन झाले तरी सोन्यात घसरण होऊन ते ३० हजार रुपयांच्या खाली गेले होते. मात्र आता अमेरिकेतील सोने बाजारात उलाढाल वाढल्याने सोन्याचे भाव पुन्हा वाढले. त्यात अमेरिकन डॉलरचे दर ७२.१० रुपये झाल्याने सोन्याच्या भाववाढीस मदत होत आहे.
चढ-उताराने चिंता
नवीन वर्षाच्या सुरुवातीलाच १ जानेवारी २०१८ रोजी सोन्याच्या २९ हजार ९०० रुपयांच्या भावासह सराफ बाजारातील व्यवहारास सुरुवात झाली होती. त्यानंतर मात्र सोन्याच्या भाववाढीस सुरुवात होऊन सोन्याने ३० हजाराचा पल्ला गाठला. त्यानंतर ही वाढ कायम राहत लग्नसराईमध्ये सोने ३१ हजाराच्या पुढे गेले. मात्र जुलै महिन्यापासून यात घसरण होत जाऊन १७ आॅगस्ट रोजी ते ३० हजाराच्या खाली आले होते. त्या दिवशी डॉलरचे मूल्य ६९.३० रुपयांवर होते त्या वेळी सोने २९ हजार ९०० रुपयांवर होते. मात्र डॉलरचे दर हळूहळू वाढत जाऊन ते ९ सप्टेंबर रोजी ७२.१० रुपयांवर पोहचले त्या वेळी सोन्याचे दर ३१ हजार रुपये झाले. डॉलरचे दर केवळ २.४० रुपयांनी वाढले तरी भारतात सोने १२०० रुपयांनी वाढल्याने रुपयांच्या अवमूल्यनाचा किती मोठा परिणाम होत आहे, हे लक्षात येते. त्यामुळे सर्वच व्यापारी चिंतीत आहे.
१७ आॅगस्ट रोजी २९ हजार ९०० रुपयांवर असलेल्या सोन्यात हळूहळू वाढ होत जाऊन ते २२ आॅगस्ट रोजी ३० हजार २०० रुपयांवर पोहचले. त्यानंतर २५ आॅगस्ट रोजी ३० हजार ४०० रुपये अशी २०० रुपयांची वाढ झाली. ३० आॅगस्ट रोजी सोने ३० हजार ८०० रुपयांवर पोहचून ७ सप्टेंबर रोजी ३१ हजाराचा पल्ला गाठला. त्यानंतर पुन्हा १०० रुपयांनी चढ-उतार कायम असल्याचे सुवर्ण बाजारात चित्र आहे.
रुपयात घसरण तरी चांदीचे भाव गडगडताहेत
एकीकडे सोन्याच्या भावात वाढ होत असली तरी दुसरीकडे मागणी नसल्याने चांदीच्या भावात घसरण होत आहे. ६ सप्टेंबर रोजी ३९ हजार ५०० रुपये प्रती किलोवर असलेल्या चांदीच्या भावात एकाच दिवसात ५०० रुपयांची घसरण होऊन ती ३९ हजारावर आली. गेल्या महिन्यातही चांदीच्या भावात अशीच घसरण झाली होती. १७ आॅगस्ट रोजी ३९ हजार ५०० रुपयांवर असलेल्या चांदीच्या भावात ५०० रुपयांची घसरण होऊन ती १८ आॅगस्ट रोजी ३९ हजारावर आली. त्यानंतर २५ आॅगस्ट रोजी ५०० रुपये प्रती किलोने वाढ होऊन चांदी पुन्हा ३९ हजार ५०० रुपयांवर पोहचली होती. मात्र आता पुन्हा घसरण झाली आहे. रुपयाच्या घसरणीने सोन्याचे भाव वाढत आहे तर दुसरीकडे चांदी गडगडत असल्याने हे गणित न उमजणारे असल्याचे सांगितले जात आहे.