Jalgaon: गळफास घेऊन तरूणाने संपविली जीवनयात्रा !

Jalgaon News: जळगाव तालुक्यातील ममुराबाद येथे जगदीश लक्ष्मण पाटील (३३) या तरूणाने राहत्या घरामध्ये गळफास घेऊन आत्महत्या केल्याची घटना शनिवारी सायंकाळी ५ वाजेच्या सुमारास उघडकीस आली.

जळगाव -  तालुक्यातील ममुराबाद येथे जगदीश लक्ष्मण पाटील (३३) या तरूणाने राहत्या घरामध्ये गळफास घेऊन आत्महत्या केल्याची घटना शनिवारी सायंकाळी ५ वाजेच्या सुमारास उघडकीस आली. दरम्यान, आत्महत्येचे कारण समजून आलेले नसून याप्रकरणी तालुका पोलिसात अकस्मात मृत्यूची नोंद करण्यात आली आहे.

जगदीश हा ममुराबाद येथे आई-वडीलांसह वास्तव्यास होता. तो जळगावातील एका कंपनीत कामगार म्हणून कामाला होता. शनिवारी घरात कुणीही नसताना त्याने गळफास घेऊन आपली जीवनयात्रा संपविली. सायंकाळी ५ वाजेच्या सुमारास कुटूंबिय घरी आल्यानंतर त्यांना मुलाचा मृतदेह गळफास घेतलेल्या अवस्थेत दिसून आल्यानंतर त्यांनी एकच आक्रोश केला. त्यानंतर ग्रामस्थांच्या मदतीने मृतदेह खाली उतरवून जिल्हा रूग्णालयात हलविण्यात आला. याठिकाणी वैद्यकीय अधिका-यांनी तपासणीअंती जगदीश याला मृत घोषित केले. यावेळी रूग्णालयात नातेवाईकांसह ग्रामस्थांची मोठी गर्दी झाली होती.