जळगाव : तुला जीवंत सोडणार नाही म्हणत तरुणाच्या डोक्यात घातले लोखंडी वजन माप

दाणाबाजारातील घटना; दोघांवर खुनाचा प्रयत्न केल्याचा गुन्हा दाखल

जळगाव : एका वाहनाचा दरवाजा दुसऱ्या वाहनाच्या बॉडीत अडकल्याने झालेल्या नुकसानीच्या कारणावरुन दिलीप अर्जुन चौधरी (वय ३१, रा.धरणगाव) या तरुणाला फळ विक्रेत्याजवळील लोखंडी वजन माप घेऊन डोक्यात घालून जीवे ठार मारण्याचा प्रयत्न केल्याची घटना दाणाबाजारात घडली. याप्रकरणी श्रीकांत प्रकाश मोरेकर (वय ३४, रा.हुडको, शिवाजी नगर) व वासुदेव पितांबर माळी (वय ५४, रा.धरणगाव) या दोघांविरुध्द शुक्रवारी सायंकाळी शनी पेठ पोलिस ठाण्यात खुनाचा प्रयत्न केल्याचा गुन्हा दाखल झाला आहे.

यासंदर्भात पोलिसात दाखल गुन्ह्यानुसार, दिलीप चौधरी व त्याचा भाऊ ४ जुलै रोजी सायंकाळी साडे सहा वाजता मालवाहू टेम्पो घेऊन दाणाबाजारातून बाहेर निघत असताना श्रीकांत मोरेकर याच्या मालवाहू वाहनाचा दरवाजा चौधरीच्या वाहनात अडकला. त्यात नुकसान झाल्याने श्रीकांत याने दिलीप याच्याकडे नुकसान भरपाई मागितली. ती देण्यास नकार दिल्याने वासुदेव माळी याने शिवीगाळ केली. दिलीप तेथून निघून जात असताना श्रीकांत याने टेम्पो समोर दुचाकी आडवी लावून ‘तुला आज जीवंत सोडणार नाही’ असे म्हणत दिलीप याला वाहनाच्या खाली ओढून लाथाबुक्यांनी मारहाण केली. शेजारीच असलेल्या फळ विक्रेत्याजवळी लोखंडी वजनकाटा घेऊन डोक्यात घातला. यात दिलीप गंभीर जखमी झाला असून त्याला दवाखान्यात दाखल करण्यात आले आहे. याप्रकरणी दिलीप याच्या फिर्यादीवरुन भा.न्या.सं.कलम १०९, १२६ (२), ११५ (२), ३५२, ३५१ (३), ३ (५) नुसार गुन्हा दाखल झाला असून श्रीकांत व माळी दोघांना अटक करण्यात आली आहे. तपास उपनिरीक्षक चंद्रकांत धनके करीत आहेत.